वाडा -कोनसई || जीव घेणारा सुतळी बॉम्बचा अनधिकृत कारखाना... पहा संपूर्ण घटनाक्रमाचा ग्राउंड रिपोर्ट

वाडा तालुक्यात अनधिकृत फटाके कारखान्यांचा सुळसुळाट; कोणसईत भीषण स्फोट, एका कामगारांचा मृत्यू ,तर चार कामगार गंभीर जखमी पालघर जिल्ह्यातील वाडा तालुक्यात अनधिकृत फटाके बनवण्याच्या कारखान्यांची संख्या वाढत असल्याची गंभीर बाब समोर येत आहे. कोणसई परिसरात अशाच एका बेकायदेशीर फटाके कारखान्यात आज भीषण स्फोट झाला असून या दुर्घटनेत एका कामगारांचा मृत्यू झाल्याची प्राथमिक माहिती समोर आली आहे, तर काही कामगार जखमी झाल्याचेही सांगितले जात आहे.या अनधिकृत कारखान्यात एकूण ३२ कामगार कार्यरत असल्याची माहिती समोर आली आहे. मिळालेल्या माहितीनुसार, वाडा तालुक्यात सण-उत्सव आणि विविध कार्यक्रमांच्या पार्श्वभूमीवर फटाक्यांची मोठ्या प्रमाणात मागणी असते. याच मागणीचा फायदा घेत अनेक ठिकाणी अनधिकृतपणे सुतळी बॉम्ब आणि इतर फटाके बनवण्याचे कारखाने सुरू करण्यात आले आहेत. या कारखान्यांकडे आवश्यक परवानग्या नसतानाही ते सुरू असल्याने मोठा धोका निर्माण झाला आहे. स्थानिक नागरिकांच्या म्हणण्यानुसार, संबंधित प्रशासन आणि पोलिसांच्या दुर्लक्षामुळे किंवा कथित आशीर्वादामुळे हे कारखाने बिनधास्तपणे चालू आहेत. आज झालेल्या स्फोटामुळे हा प्रश्न अधिक गंभीर झाला असून प्रशासनाच्या कार्यक्षमतेवर प्रश्नचिन्ह निर्माण झाले आहे. घटनास्थळी स्थानिक पोलीस दाखल झाले असून बचावकार्य सुरू आहे. मात्र, अग्निशमन दलाची गाडी उशिरा पोहोचत असल्याने परिस्थिती नियंत्रणात आणण्यास अडचणी येत असल्याची माहिती समोर येत आहे. दरम्यान, या घटनेनंतर नागरिकांमध्ये संतापाची लाट उसळली असून दोषींवर कडक कारवाई करण्याची मागणी जोर धरत आहे. तसेच वाडा तालुक्यात सुरू असलेल्या सर्व अनधिकृत फटाके कारखान्यांची तातडीने चौकशी करून त्यांच्यावर कारवाई करावी, अशी मागणीही नागरिकांकडून केली जात आहे.