ANG KAHARIAN AY SA PANGINOON | PSALM 22:28-29

May mga totoong naghahari dahil sila ay pinosisyon sa katungkulang ito, ilang bansa rin ang hari ang tawag sa namumuno sa kanila. Meron namang naghahari-harian, nanakot at nang-aapi ng kapwa dahil sa kanilang ipinagmamalaking yaman o kapangyarihan. Maraming api, maraming nakakaranas ng panggigipit dahil may mga naghahari-harian sa ibat-ibang kaparaanan at nag-aakalang walang makakagalaw sa kanila kailanman. Ngunit may totoong Hari na nagmamasid ng lahat ng ganap sa mundong ibabaw. May Diyos na nakatingin at nahahabag sa mga pinahihirapan, naririnig Niya ang hinaing ng mga taong sa Kanya ay humihingi ng saklolo. Nakikinig Siya at kikilos para tugunin ang mga ito, hindi Siya bingi at nanonood lang sa Kanyang trono. Kumikilos Siya ng may katarungan at pagmamahal. Mananagot ang mga nag-akalang sila ang tanging hari, ang may higit na kapangyarihan, at may karapatang gawin ang gusto nila sa kanilang nasasakupan. Haharap ang lahat sa tunay na Hari, ang naapi ay Kanyang ipagtatanggol at ang mga nang-api ay Kanyang parurusahan. Siya ang may karapatan at ang may walang hanggang kapangyarihan. Siya ang Hari ng mga hari, Panginoon ng mga panginoon at Siya lamang ang dapat sambahin at paglingkuran ng lahat ng tao. Ang ano mang kapangyarihan na mayroon ang mga namumuno sa mundo, ito ay ayon sa Kanyang pag-aadya, Siya ang naglagay sa kanilang kinaroroonan. Walang makakapagmalaki sa Kanya, Siya ang may-ari ng langit at lupa at walang makakagapi sa Diyos. Walang hanggan ang Kanyang paghahari at walang makakapagpabago ng Kanyang mga gawi.