Khit Thit Morning News | June 30 2026

Khit Thit သတင်းဌာန၏ ဇွန် ၃၀ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ ဇွန် ၃၀ ရက် မနက်ပိုင်း တင်ဆက်ပေးမယ့် သတင်းတွေကတော့ -အကြမ်းဖက်စစ်ခေါင်းဆောင်မင်းအောင်လှိုင်ရဲ့ တင်းကျပ်လွန်းတဲ့ သွင်းကုန်မူဝါဒတွေကို ဖြေလျှော့ပေးဖို့ သူနဲ့နီးစပ်တဲ့ ခရိုနီစီးပွားရေးသမားတချို့ စုပေါင်းပြီး သွားရောက်တင်ပြ တောင်းဆိုခဲ့ပေမယ့် မင်းအောင်လှိုင်က လုံးဝသဘောမတူဘဲ ပယ်ချခဲ့တယ်လို့ UMFCCI သတင်းရင်းမြစ်က ပြောပါတယ်။ စစ်ကိုင်းတိုင်း၊ ယင်းမာပင်ခရိုင် အမှတ် (၆) တပ်ရင်း တပ်ရင်းမှူး ရဲဘော်ပုလဲမောင် ပစ်ခတ် သတ်ဖြတ်ခံရတဲ့ ဖြစ်စဉ်နဲ့ပတ်သက်ပြီး ယင်းမာပင်ခရိုင် ကွပ်ကဲရေးမှူး ဗိုလ်စွမ်းသူမောင်၊ ပစ်ခတ်ခဲ့တဲ့ ရဲဘော် ငဖြိုးနဲ့ ခရိုင်တာဝန်ရှိသူတချို့ကို ဖမ်းဆီးထိန်းသိမ်းပြီး ပြည်သူ့ကာကွယ်ရေးတပ်မတော် (PDF) စစ်ရုံးချုပ်ကို ခေါ်ဆောင်စစ်ဆေးနေတယ်လို့ ပြည်သူ့ကာကွယ်ရေးတပ်မတော်သတင်းရင်းမြစ်က ပြောပါတယ်။ ကချင်ပြည်နယ်၊ မြစ်ကြီးနားမြို့၊ မိုင်းနားကျေးရွာအနီး မှန်ပြတောင်မှာ တပ်စွဲထားတဲ့ စစ်တပ်က အရာရှိတချို့ဟာ ကံပိုက်တီ-မိုင်းနားလမ်းကြောင်းကို ဖြတ်သန်းသွားလာနေတဲ့ ကုန်တင်ယာဉ်တွေကို မတရားငွေကြေးကောက်ခံနေတဲ့အပြင် ဒေသခံကချင်ကုန်သည်တွေနဲ့ အလုပ်သမားတွေကို ပစ်မှတ်ထားပြီး ငွေညှစ်တာ၊ ပစ္စည်းသိမ်းယူတာတွေ လုပ်ဆောင်နေတယ်လို့ ဒေသခံကုန်သည်တွေနဲ့ ပြည်သူတွေက ပြောပါတယ်။ အရှေ့အလယ်ပိုင်း ဟော်မုဇ်ရေလက်ကြားအတွင်း အပြန်အလှန်စစ်ရေးတင်းမာမှုတွေ ဆက်ဖြစ်နေ တဲ့အတွက် အမေရိကန်နဲ့ အီရန်ကြား ရရှိထားတဲ့ နားလည်မှုစာချွန်လွှာ (MoU) အကောင်အထည် ဖော်ရေး အပေါ် စိုးရိမ်မှုတွေ မြင့်တက်နေချိန်မှာ ကာတာနိုင်ငံ ဒိုဟာမြို့မှာ နှစ်နိုင်ငံ တွေ့ဆုံဆွေးနွေး မယ်လို့ အမေရိကန်သမ္မတဒေါ်နယ်ထရမ့်က ပြောပေမယ့် အီရန်ဘက်ကတော့ အဲဒီလို အစီအစဉ် မရှိဘူးလို့ ငြင်းဆိုလိုက်တဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။