ဧရာဝတီတိုင်းက ဟိုတယ်တည်းခိုခန်းတွေကို စစ်တပ် ဝင်စစ်နေ | People's Spring

ဧရာဝတီတိုင်းက ဟိုတယ်တည်းခိုခန်းတွေကို စစ်တပ် ဝင်စစ်နေ ဇူလိုင်-၈၊ ၂၀၂၆။ People's Spring ရေကြည် နဲ့ လေးမျက်နှာမြို့နယ်​တွေမှာ တိုက်ပွဲတွေပြင်းထန်နေချိန် စစ်တပ်က ဧရာဝတီတိုင်းထဲက မြို့နယ်တွေမှာရှိတဲ့ ဟိုတယ်နဲ့ တည်းခိုခန်းတွေကို ရှောင်တခင်ဝင် စစ်ဆေးပြီး နေ့စဉ်တည်းခိုသူစာရင်းတွေ မဖြစ်မနေပေးဖို့ ဖိအားပေးနေပါတယ်။ ပုသိမ်၊ သာပေါင်း၊ ငပုတော၊ မအူပင်၊ ဟင်္သာတ၊ မြန်အောင်အပါအဝင် တိုက်ပွဲဖြစ်နေတဲ့နေရာတွေနဲ့ နီးစပ်တဲ့ မြို့နယ်တွေမှာ စစ်တပ်က စစ်ဆေးမှုတွေ ပိုမိုပြုလုပ်​​​နေတာ ဖြစ်ပါတယ်။ ရုတ်တရက်ဝင်စစ်ဆေးပြီး သူတို့မကြိုက်တာတွေ့ရင် ငွေညှစ်ပြီး ခံဝန်ထိုးခိုင်းတယ်လို့ ပုသိမ်မြို့မှာရှိတဲ့ တည်းခိုခန်း ဝန်ထမ်းတစ်ဦးက စစ်တပ်ရဲ့ စစ်ဆေးမှုနဲ့ပတ်သက်ပြီး ပြောပါတယ်။ စစ်တပ်ဟာ ဂွမြို့ကို ပြန်လည်သိမ်းယူမယ်လို့ကြုံဝါးပြီး ဧရာဝတီတိုင်းဘက်ကတဆင့် စစ်ကြောင်းတွေ ဝင်ရောက်လာပြီးတဲ့နောက်ပိုင်း ပြီးခဲ့တဲ့ဇွန်လကစပြီး ရေကြည်မြို့နယ်ထဲမှာ တိုက်ပွဲတွေ ပိုမိုပြင်းထန်လာခဲ့ပါတယ်။ ရခိုင်ပြည်နယ်နဲ့ဆက်စပ်နေတဲ့ သာပေါင်းနဲ့ လေးမျက်နှာမြို့နယ်တွေမှာလည်း တိုက်ပွဲတွေဖြစ်ခဲ့ပါတယ်။ ဇွန်လကစပြီး တိုက်ပွဲတွေ သိသိသာသာပြင်းထန်လာပြီးတဲ့နောက်ပိုင်း ရေကြည်မြို့နယ်ထဲက စစ်တပ်စခန်းတွေကို အာရက္ခတပ်တော်(AA)နဲ့ မဟာမိတ်တွေက ဆက်တိုက်သိမ်းယူနေပါတယ်။ ဇွန်လက တိုက်ပွဲတွေထဲမှာ ရေကြည်မြို့နယ်ထဲက ပွိုင့်(၂၈၈)ကုန်း၊ ပွိုင့်(၁၈၈)ကုန်းနဲ့ ပွိုင့်(၁၄၈)ကုန်းတွေကို AAက သိမ်းယူခဲ့ပြီး ဒီဇူလိုင်လဆန်းမှာပဲ ပွိုင့်(၂၂၇)ကုန်းရဲ့ ကာကင်းစခန်းကုန်းနှစ်ခုကို ထပ်မံသိမ်းယူနိုင်ခဲ့တယ်လို့ သတင်းထုတ်ပြန်ထားပါတယ်။ စစ်တပ်က ရေကြည်မြို့နယ်ထဲက အမြောက်တပ်(၃၄၄)နဲ့ လေးမျက်နှာမြို့ဘက်မှာလည်း အင်အားဖြည့်တင်းနေတယ်လို့ AAက ထုတ်ပြန်ပါတယ်။ ပုသိမ်-မုံရွာလမ်းပိုင်းမှာလည်း တပ်ဖွဲ့ဝင်အင်အားအများအပြားသုံးပြီး နေရာယူထားတယ်လို့လည်း AAက အသိပေးပါတယ်။ အဲဒီလို တိုက်ပွဲတွေပြင်းထန်နေစဉ် ဒေသတွင်း ရထားလမ်းနဲ့ ကားလမ်း ဆက်သွယ်ရေးလမ်းပိုင်းတွေမှာ စစ်တပ်က စစ်ဆေးရေးတင်းကြပ်နေသလို တည်းခိုခန်းနဲ့ ဟိုတယ်တွေကိုလည်း ရှောင်တခင်ဝင်ရောက်စစ်ဆေးတာတွေ ပြုလုပ်နေပါတယ်။ ဒါ့အပြင် စစ်တပ်ဟာ ပေါ်တာဆွဲတာနဲ့ အကြောင်းအမျိုးမျိုးပြပြီး ဖမ်းဆီးတာတွေလည်း လုပ်ဆောင်နေတယ်လို့ မအူပင်မြို့ခံတစ်ဦးက ပြောပါတယ်။ ===== မန္တလေးကျောက်ဝိုင်းမှာ ပျူတွေ ခြိမ်းခြောက်ငွေတောင်း​​ ဇူလိုင်-၈၊ ၂၀၂၆။ People's Spring မန္တလေးမြို့၊ မဟာအောင်မြေကျောက်ဝိုင်းအတွင်းမှာ ပျူစောထီးတွေက ခြိမ်းခြောက်ငွေတောင်းနေလို့ အခက်အခဲ ဖြစ်နေကြောင်း ကျောက်လုပ်ငန်းလုပ်ကိုင်သူတွေက ပြောပါတယ်။ မဟာအောင်မြေကျောက်ဝိုင်းအတွင်းမှာ စစ်တပ်လက်​အောက်ခံ ပျူစောထီးတွေဟာ အုပ်စုဖွဲ့ပြီး ကိုယ်တိုင်ကျောက်လုပ်တာ ဒါမှမဟုတ် ကျောက်လုပ်သူတွေနဲ့ လိုက်ပါလာတာတွေရှိပြီး လုပ်ငန်းရှင်တွေ၊ ကုန်သည်တွေ၊ အရောင်းအဝယ်ဖြစ်သွားတဲ့ ကျောက်သမားတွေဆီကနေ ခြိမ်းခြောက်​ငွေတောင်းတာတွေ ရှိနေကြောင်း ကျောက်သမားအချို့က ပြောပါတယ်။ အရောင်းအဝယ်ဖြစ်လိုက်ပြီဆိုရင် ဝိုင်းထဲမှာပဲ ဖြစ်ဖြစ်၊ လမ်းကနေ စောင့်ပြီး​​တောင်းတာဖြစ်ဖြစ် ခြိမ်းခြောက်ပြီး ငွေတောင်းတာတွေ အမြဲလိုလိုလုပ်နေတယ်လို့ ကျောက်သမားတစ်ဦးက ပြောပါတယ်။ ပျူတွေဟာ အုပ်စုဖွဲ့ငွေတောင်းယူတဲ့အပြင် ကျောက်သမားတွေကို အကြောင်းမဲ့ပြဿနာရှာတာ၊ ကိုယ်ထိလက်ရောက် ရမ်းကားတာတွေရှိနေတာကြောင့် ကျောက်အရောင်းအဝယ်လုပ်တဲ့နေရာမှာ အခက်အခဲတွေရှိနေတယ်လို့ ကျောက်သမားတွေဆီက သိရပါတယ်။ စစ်တပ်နဲ့ လက်အောက်ခံ ပျူစောထီးတွေဟာ အာဏာသိမ်းကာလအစောပိုင်းတုန်းက ကျောက်ဝိုင်းပြင်ပမှာ အရောင်းအဝယ်လုပ်နေတဲ့ ကျောက်သမားအများအပြားကို ဝင်ရောက်ဖမ်းဆီးပြီး ငွေညှစ်တာ၊ ထောင်ချတာတွေ လုပ်ခဲ့ပါသေးတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #Ayeyarwady #MilitaryInspection #MyanmarNews #SecurityCheck #PeopleSpring #ဧရာဝတီ #စစ်ကောင်စီ #ဟိုတယ်စစ်ဆေးမှု #သတင်း #Mandalay #MandalayGemMarket #PyuSawHtee #Extortion #MyanmarNews #မန္တလေး #မန္တလေးကျောက်ဝိုင်း #ပျူစောထီး #ခြိမ်းခြောက်ငွေတောင်းမှု #သတင်း