Khit Thit Morning News | May 15 , 2026

Khit Thit သတင်းဌာန၏ မေ ၁၅ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ မေ ၁၅ ရက် မနက်ပိုင်း တင်ဆက်ပေးမယ့် သတင်းတွေကတော့ -ဥရောပသမဂ္ဂ(EU) က မြန်မာနိုင်ငံမှာ စစ်အာဏာသိမ်းခဲ့တဲ့ မင်းအောင်လှိုင်တို့လို စစ်ခေါင်းဆောင်တွေ၊ လူပုဂ္ဂိုလ်တွေနဲ့ ကုမ္ပဏီတွေကို ချမှတ်ထားတဲ့ စီးပွားရေးပိတ်ဆို့မှုတွေကို ၂၀၂၇ ခုနှစ် ဧပြီ ၃၀ ရက်အထိ နောက်ထပ်တစ်နှစ် ထပ်တိုးလိုက်ပါတယ်။ ဧရာဝတီတိုင်း ရေကြည်မြို့နယ်မှာရှိတဲ့ စစ်ကောင်စီရဲ့ အမတ ၃၄၄ အမြောက်တပ်က ကာကင်းစခန်းတွေကို အာရက္ခတပ်တော် (AA) နဲ့ ပူးပေါင်းတပ်တွေက အကုန်လုံးသိမ်းပိုက်နိုင်ခဲ့ပြီး လက်ရှိမှာတော့ တပ်ရင်းဌာနချုပ်ထဲမှာ တိုက်ပွဲ ပြင်းပြင်းထန်ထန်ဆက်ဖြစ်နေတယ်လို့ ဒေသသတင်းရင်းမြစ်တွေနဲ့ CDM ဗိုလ်ကြီးဇင်ယော်က ပြောပါတယ်။ စစ်ကိုင်းတိုင်း ကလေးမြို့ စက်မှုဇုန် လှိုင်သာယာရပ်ကွက်မှာ ဒေသကွပ်ကဲမှုစစ်ဌာနချုပ် (ဒကစ) တပ်က ဒုအရာခံဗိုလ်အောင်ကျော်ဇောနဲ့ စစ်သားတစ်ဦးကို ကလေး UG တပ်ဖွဲ့က ပစ်ခတ်တိုက်ခိုက်ခဲ့ရာ နှစ်ဦးလုံး သေဆုံးခဲ့တယ်လို့ သိရပါတယ်။ အမေရိကန်သမ္မတဒေါ်နယ်ထရန့်ရဲ့ တရုတ်နိုင်ငံခရီးစဉ် ပထမနေ့မှာပဲ တရုတ်သမ္မတ ရှီကျင့်ဖျင်နဲ့ တွေ့ဆုံခဲ့ပြီး ကမ္ဘာ့ရေနံကုန်သွယ်ရေးအတွက် အရေးပါတဲ့ ဟော်မုဇ်ရေလက်ကြားကိစ္စအပါအဝင် အီရန်အရေးနဲ့ပတ်သက်ပြီး အရေးကြီးတဲ့သဘောတူညီချက်တွေ ရရှိခဲ့တဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။