Səməndər Rzayev - 80 (ATV)

ATV, 15.04.2025 Aprelin 14-də Azərbaycan Dövlət Film Fondunda görkəmli teatr və kino aktyoru, Əməkdar artist Səməndər Rzayevin 80 illik yubileyi münasibətilə xatirə gecəsi keçirildi. Tədbir çərçivəsində sənətkarın həyat və yaradıcılığını özündə əks etdirən fotosərginin açılışı oldu. Xatirə gecəsini giriş sözü ilə tədbirin aparıcısı, Azərbaycan Dövlət Film Fondunun direktoru, Əməkdar incəsənət xadimi Cəmil Quliyev açaraq, S.Rzayevin çoxşaxəli yaradıcılıq yolu haqqında məlumat verdi, onun teatr və kino fəaliyyətilə yanaşı, dublyaj sahəsində də şöhrət qazandığını qeyd etdi. Azərbaycan Kinematoqrafçılar İttifaqının sədri, Xalq artisti Rasim Balayev görkəmli aktyorla birlikdə keçən gənclik illərini xatırladı, onunla ilk dəfə “Nəsimi” filmində tərəf-müqabili olduğunu bildirdi. Sonra çıxış edən Xalq artistləri Şəfiqə Məmmədova, Rafiq Əzimov, Tariyel Qasımov, sənətşünaslıq doktoru, professor İlham Rəhimli tanınmış aktyor haqqında xatirələrini bölüşdülər. Əməkdar incəsənət xadimi, kinoşünas Aydın Kazımzadə sənətkarın kino yaradıcılığı haqqında məlumat verdi. Sonda sənətkarın ailə üzvləri adından qızı Rübabə Səməndər çıxış edərək, tədbirin təşkilinə görə Dövlət Film Fondunun rəhbərliyinə və kollektivinə təşəkkürünü bildirdi. Tədbir boyu sənətkarın həyat və yaradıcılığını özündə əks etdirən videoçarx və aktyorun çəkildiyi, dublyaj etdiyi filmlərdən fraqmentlər nümayiş etdirildi.