Ramiz Həsənoğlu - 80 (AZƏRTAC, geniş versiya)

AZƏRTAC, 01.05.2026 Aprelin 30-da Azərbaycan Dövlət Film Fondunda Xalq artisti, görkəmli kino və televiziya rejissoru Ramiz Həsənoğlunun 80 illik yubileyi keçirildi. Tədbir çərçivəsində sənətkarın həyat və yaradıcılığını özündə əks etdirən fotosərginin açılışı oldu. Azərbaycan Respublikası Mədəniyyət Nazirliyi adından yubilyarı təbrik edən nazir müavini Səadət Yusifova Azərbaycan televiziyasının və kinosunun inkişafında Ramiz Həsənoğlunun xidmətlərindən bəhs etdi, onun dövlət tərəfindən bir çox mükafatlarla təltif olunduğunu vurğuladı. Tədbirin aparıcısı, Azərbaycan Dövlət Film Fondunun direktoru, Əməkdar incəsənət xadimi Cəmil Quliyev Ramiz Həsənoğlunun yaradıcılığından danışaraq, onun bədii və sənədli filmlərini, televiziya tamaşalarını təhlil etdi. Azərbaycan Kinematoqrafçılar İttifaqı adından birinci katib, Xalq artisti Şəfiqə Məmmədova, Xalq yazıçısı Anar, Xalq artistləri Xalidə Quliyeva, Hacı İsmayılov, Məbud Məhərrəmov, Əməkdar incəsənət xadimi Aydın Talıbzadə, Əməkdar mədəniyyət işçisi Azər Turan, “Qobustan” jurnalının baş redaktoru Pərvin Nurəliyeva, jurnalist İlhamiyyə Rza yubilyara təbriklərini çatdırdılar, ona yaradıcılıq uğurları arzuladılar. Azərbaycan Teatr Xadimləri İttifaqı adından sədr, Xalq artisti Hacı İsmayılov yubilyara “Sənətkar” medalını, ANS Şirkətlər Qrupunun prezidenti Vahid Mustafayev “VMF” şirkəti tərəfindən Ramiz Həsənoğlunun yubileyinə məxsusi buraxılmış hədiyyəni kino xadiminə təqdim etdi. Sənətkarın 80 illiyinə həsr olunmuş “Qobustan” jurnalı tədbir iştirakçılarına paylanıldı. Tədbirdə Baku TV-nin yubilyara həsr etdiyi, rejissor İman Məcidovun çəkdiyi “Sənin boyun ucadır” filmi və rejissor Elnaz Əblucun hazırladığı videoçarx nümayiş etdirildi.