Ministrja Kodheli dhe shefi i Shtabit Bazo në Afganistan

Website: https://www.mbrojtja.gov.al Facebook:   / ministriambrojtjes   Twitter:   / min_mbrojtjes   ----------------------------------------------------- Ministrja e Mbrojtjes, znj.Mimi Kodheli dhe shefi i Shtabit të Përgjithshëm të Forcave të Armatosura, gjeneralmajor Jeronim Bazo zhvilluan një vizitë 24 orëshe në Afganistan. Drejtuesit e Ministrisë së Mbrojtjes dhe të Shtabit të Përgjithshëm të FA u takuan me komandantin e misionit ISAF, gjeneral Joseph F. Dunford, me ambasadorin e NATO në Afganistan, Maurits R. Jochems, me komandantin e Komandës së Bashkuar gjenerallejtënant Joseph Anderson, si dhe me gjeneral brigade, James E. Rainey, zëvendëskomandantin e Komandës Rajonale të Jugut, komanda direkte nën të cilën veprojnë trupat speciale shqiptare, të cilat kontribuojnë për paqen në Afganistan, në rajonin e Kandaharit. Në takimet e tyre me drejtues civilë dhe ushtarakë, ministrja Kodheli dhe gjeneralmajor Bazo, diskutuan për problematikën e tranzicionit të misionit ISAF pas vitit 2014, për aspektet operacionale aktuale, për kontributin që japin Forcat e Armatosura të Republikës së Shqipërisë në këtë operacion dhe perspektivën e kontributit të FA në periudhën post-ISAF. Në këtë kuadër znj. Kodheli edhe një herë rikonfirmoi angazhimin e qeverisë shqiptare për të mbështetur vendimin e Aleancës. Vizita e ministres së Mbrojtjes dhe shefit të Shtabit të FA në Afganistan, shërbeu për të kontaktuar në mënyrë të drejtpërdrejte me trupat tanë në terren. Nëpërmjet një bashkëbisedimi të ngrohtë, ministrja e Mbrojtjes tregoi mbështetjen maksimale dhe të pakursyer, të qeverisë, Ministrisë së Mbrojtjes, për detyrën e vështirë dhe të rëndësishme që ata po kryejnë. Në kuadër të takimit me trupat tona, znj Kodheli, i informoi për programet që qeveria, administrata e re shqiptare ka në drejtim të FA, mbështetjes së tyre në konsolidimin e proceseve që çojnë në përmirësimin e kushteve të ushtarakut, në trajtimin e tyre të ndershëm në raport me kërkesat e detyrave. Znj. Kodheli i informoi ushtarakët tanë për reformimin, që po i bëhet Forcave të Armatosura, për punën në drejtim te përmirësimit të kuadrit ligjor, që synon rikthimin e dinjitetit të ushtrisë në përputhje me standardet NATO. Znj. Kodheli dhe gjeneralmajor Bazo në takimet direkte me efektivët e MAT 5 dhe Eagle 8, dy misione të cilat shërbejnë në Kabul dhe Kandahar përkrah aleatëve tanë, vlerësuan profesionalizmin e tyre në kryerjen e detyrës. Ministrja Kodheli falënderoi trupat tanë për përkushtimin me të cilin po bëjnë detyrën e tyre tejet të vështirë por shumë të rëndësishme. Angazhimi i tyre me përgjegjshmëri maksimale në kryerjen e detyrave është mbresëlënës, theksoi znj.Kodheli. "Në takimet që unë pata me drejtues të lartë ushtarakë dhe civilë, vura re me kënaqësi se komandantët e Aleancës në terren, ndajnë të njëjtin vlerësim: 'trupat speciale shqiptare janë të përgjegjshme dhe në lartësinë e detyrës së tyre' dhe kjo më gëzoi dhe me mbushi me krenari", - nënvizoi kreu i Mbrojtjes.