IMUT WIEĦED MILL-QATTIELA TAL-WARDEN GĦAWDXIJA

ONE.COM.MT • Tħabbret il-mewt ta’ Ġanni Attard li għaxar snin ilu ntbgħat għomru l-ħabs wara li nstab ħati li kien kompliċi fil-qtil tal-warden Għawdxija Fortunata Spiteri. Huwa miet fl-għomor ta’ tnejn u sebgħin sena. Intant One News jinsab infurmat li mill-awtopsja rriżulta li Attard miet minħabba mard tal-qalb. KITBA KYLE MIFSUD FILMAT ARKIVJI Ġanni Attard li għaxar snin ilu ġie kkundannat għomru l-ħabs wara li nstab ħati ta’ kompliċità fil-qtil tal-gwardjana lokali Fortunata Spiteri, dalgħodu nstab mejjet fiċ-ċella tiegħu fil-ħabs ta’ Kordin. Attard kellu tnejn u sebgħin sena u bħal vittma kienu joqgħod ix-Xagħra Għawdex. Fi stqarrija, l-Aġenzija għas-Servizzi Korrettivi qalet li Barbara, instab mejjet għall-ħabta tas-sitta u nofs tat-Tnejn filgħodu. Għaxar snin ilu, Attard li kien jaħdem bħala xufier tal-karozza tal-linja kien instab ħati f’ġuri li fl-10 ta’ Awwissu tal-2001 kien kompliċi fl-omiċidju ta’ Spiteri. Huwa ma kienx instab ħati li kien il-moħħ wara dan il-qtil. Fl-għoti tas-sentenza, l-Imħallef Michael Mallia kkundannah il-piena massima li kienet tagħtih l-liġi f’każ fejn persuna tinstab ħatja ta’ kompliċità li fis-sistema ġudizzjarja tagħna, il-ħati jrid jibqa’ maqful fiċ-ċella sa mewtu. Fil-Qorti kien ingħad li Spiteri ġiet attakkata u nqatlet b’ħames daqqiet ta’ sikkina fit-triq li mir-Rabat tagħti għall-Għarb b’rabta mal-festa fil-lokalità ta’ San Lawrenz. Hija kellha sebgħa u erbgħin sena. Attard kien it-tieni persuna li kien intbagħat il-ħabs b’rabta ma’ dan il-qtil, l-ewwel u l-uniku qtil fl-istorja tal-gwardjani f’Malta. Benny Attard kien ikkundannat tletin sena ħabs wara li ammetta flok għadda ġuri bis-sehem tiegħu fir-reat. Ġużeppi Farrugia, akkużat ukoll fil-każ kien miet qabel intemmu l-proċeduri kontra tiegħu. Fid-deċiżjoni tiegħu, l-Imħallef Mallia kien sostna wkoll li Ġanni kien qatta’ ħajtu jisfida lill-awtoritajiet u baqa’ ma tgħallem qatt mill-iżbalji tiegħu. Ħamsa u erbgħin sena ilu, huwa kien ikkundannat erba’ snin ħabs wara li kien instab ħati li darab gravi lil missieru Wenzu f’tilwima bejnu u ħuh. Dakinhar il-missier daħal biex iferraqhom u spiċċa miet wara li qala’ tir ta’ senter li ġie sparat minn Ġanni. L-Aġenzija għas-Servizzi Korrettivi qalet li bil-mewt ta’ Attard ġew infurmati minnufih il-pulizija tad-distrett biex jinvestigaw, u nħatret inkjesta bil-Maġistrat tal-Għassa, kif ukoll inkjesta interna