RC Malima awataka madiwani kusimamia miradi ya maendeleo kupunguza hoja za CAG

RC Malima awataka madiwani kusimamia miradi ya maendeleo kupunguza hoja za CAG Madiwani wa Halmashauri ya Wilaya ya Malinyi wametakiwa kuwasimamia watendaji wa halmashauri yao ili  kuepusha hoja za ukaguzi kutoka kwa Mkaguzi na Mdhibiti Mkuu wa Hesabu za Serikali (CAG). Agizo hilo limetolewa Julai 1, 2026 na Mkuu wa Mkoa wa Morogoro, Mhe. Adam Kighoma Malima, wakati wa kikao cha kupitia na kukagua hoja za Mkaguzi na Mdhibiti Mkuu wa Hesabu za Serikali (CAG) kilichofanyika Wilayani. Mhe. Malima amesema, katika mwaka wa fedha 2025/2026, halmashauri hiyo ya Malinyi imepata jumla ya hoja 33 za ukaguzi, ambapo nyingi zimesababishwa na uzembe wa baadhi ya watendaji kushindwa kutekeleza majukumu yao kwa weledi, hali iliyochangia kujitokeza kwa dosari katika utekelezaji wa miradi ya maendeleo. "..Hapa pana elementi ya uzembe. Kama kuna elementi ya ubadhirifu, tunawasubiri TAKUKURU..." amesema Mhe. Adam Malima. Aidha, Mkuu huyo wa Mkoa amepongeza uongozi wa Halmashauri ya hiyo kwa usimamizi na utendaji kazi mzuri, jambo lililochangia kutekeleza vema maendeleo ya wananchi wa Malinyi, Mkoa wa Morogoro na Taifa kwa ujumla. Kwa upande wake, Diwani wa Kata ya Ngohelanga Jenas Jonas Kyerike  amesema sheria na taratibu ziko wazi kuwa hakuna ujenzi wowote unaopashwa kuendelea bila kupata vibali kutoka kwa wataalamu husika. Ameongeza kuwa ni muhimu kuwepo kwa uwajibikaji kwa viongozi wanaohusika na ufujaji wa mali za umma kupitia utekelezaji wa miradi ya maendeleo. Naye Katibu Tawala wa Mkoa wa Morogoro, Dkt. Mussa Ali Mussa, amewataka watumishi wa halmashauri hiyo kuhakikisha wanayafahamu na kuyasimamia ipasavyo mambo yote yanayotekelezwa katika halmashauri. Pia amewasisitiza kujiepusha na migogoro inayoweza kuathiri utendaji kazi, pamoja na kuacha tabia ya kuomba uhamisho mara kwa mara. Mkuu wa Mkoa wa Morogoro, Mhe. Adam Kighoma Malima, ameongoza vikao vya kupitia na kukagua hoja za Mkaguzi na Mdhibiti Mkuu wa Hesabu za Serikali (CAG) katika Halmashauri za Wilaya za Malinyi na Ulanga Leo, Julai 2, 2026, ataendelea na vikao hivyo katika Halmashauri ya Mlimba na Halmashauri ya Mji wa Ifakara. Mwisho.