IWACU I NTONGWE KU MAYAGA YA BONHOMME RW/ 2 VERSIONS

Kinazi iherereye mu cyahoze ari Teritwari ya Nyanza, Sheferi y’Amayaga yatwarwaga na Shefu Celestini Mukarage. Nyuma ya Mukarage, hagabanywe na Shefu Kimonyo ndetse na Sushefu Nkusi. Imvururu zo muri 1959, aribyo bise revolusiyo yo muri 1959, nizo zamenesheje abo batware kimwe n’abandi batutsi bamwe bo ku Mayaga. Shefu Kimonyo azwiho kuba yari umuntu wegera ingabo ze, akazikoresha kandi agashimwa. Amayaga ni ahantu hashahse, h’udusozi tugufi, h’umukenke n’uduhuru dutoya; hagati y’agasozi n’akandi hakaba amazi(savane). Iyo miterere rero yatumye Amayaga aba igihugu cy’ubworozi bw’inka, hazwi cyane kuba inzuri z’Inyambo; abashumba bazo bazwi n’ubu bavugwa ku Mayaga ni nka Kanuma, Semagugu na Gafuku bene Sevara. Uretse inyambo z’Umwami, uwashakaga kworora wese yiyiziraga ku Mayaga kubera ubwatsi buryohera inka n’amariba atagira inenge. Uwazaga ari umworo nawe, ntiyasubizwaga inyuma yarazaga akagabirwa nawe ntibitinde akaba umworozi. Udatunze n’imwe, kuko nabo babagaho babitewe ahanini no kudakunda uwo mwuga, yakamirwaga n’abaturanyi. Ibi bigaragza imibanire myiza abanyamayaga bari bafitanye. Amayaga kandi kari agace k’ubworozi bw’inzuki. Nta kibazo cy’amoko cyaharangwaga muri ibyo bihe bya mbere ya 1959. Abanyamayaga uretse guhurira kuri uwo mwuga w’ubworozi, bari banahujwe n’umwuga w’ubuhigi. Umwami Mutara wa III Rudahigwa yakundaga guhigira ku Mayaga, agashyikirana n’abanyamayaga bakamukunda akabakunda. Bari abagabo b’abarashi, kurashisha umuheto bigatwozwa n’abakiri bato, bamara gukura, bikaba umwuga kuko muri savane habaga inyamaswa z’inkazi: nk’intare n’ingwe, buri wese yari afite inshingano zo kurinda no kurengera amatungo ye. Mu mihango yo kumurikira Umwami inka n’umuhigo habaga imyiyereko yo kurashisha umuheto, bityo kurasa bihinduka n’umwe mu mikino y’abanyarwanda. Mu birori byose iyo “parade” niyo yasozaga. Amayaga hari ahantu hakunze kwimukirwa n’abantu baturutse ahandi mu duce tw’u Rwanda, cyane cyane aho amashyaka ya politiki yadukiye mu Rwanda agateza umuryane mu Banyarwanda muri 1959-1961; ahari hizewe umuntu yabona imbaraga zo kwirwanaho no gufatanya n’abandi ni ku Mayaga. Abahindutse abatindi kubera kunyagwa imitungo yabo na Parmehutu,bagannye ku Mayaga gushaka amasambu mashya n’inzuri, kuko uretse ubworozi, Amayaga aranarumbuka cyane ku bihingwa bitunga abanyarwanda: amasaka ibishyimbo.