Өз кан басымыңды билип ал!” — Мырза-Аке дарыгерлери калк арасында түшүндүрүү иштерин жүргүзүүдө

Мырза-Аке жалпы дарыгерлер практикалык борборунун медайымы Фатима Төрөгелдиева билдиргендей, сентябрь–октябрь айларында өлкө боюнча “Өз кан басымыңды билип ал!” аттуу акция өтүүдө. Анын алкагында аймактагы фельдшер-акушердик пункттарда (ФАП) жана айыл аймактарда түшүндүрүү иштери жүргүзүлүп, семинарлар жана чогулуштар байма-бай уюштурулууда. Семинардын жүрүшүндө кан басым ооруларынын алдын алуу, туура тамактануу жана активдүү жашоо образынын мааниси тууралуу маалыматтар берилет. Ошондой эле медайымдар калкка давление өлчөөнү үйрөтүп, ар бир жаранды текшерүүдөн өткөрүп келишет. Фатима Төрөгелдиеванын айтымында, кан басым оорулары көбүнчө туура эмес тамактануудан, кыймылдын аздыгынан, ошондой эле туз менен шекерди ашыкча колдонгондон улам келип чыгат. “Элдин саламаттыгы — өзүнүн жоопкерчилигинде. Ар бир адам жылына жок дегенде бир жолу кан басымын текшерип турууга тийиш”, — дейт медайым.