Çadırda yırtıcı heyvanların əhatəsində 11 il yaşayan qadın

Əzəmət Mikayılova Möhübbət qızı Ağsu rayon Ərəbmehdibəy kəndində, yaşayış olan yerdən təxminən 10 km aralıda çöllük ərazidə yaşayır. Xanım Mikayılova ağaclardan, müxtəlif əşyalardan özünə çadır düzəldib. Qadının dediyinə görə, əvvəllər mal-qarası olub, ancaq onu aldadaraq əlindən alıblar. Bununla bağlı bir çox qurumlara müraciət etsə də, ona kömək edən olmayıb. Yaşlı qadının sözlərinə görə, 11 ildir çöllükdə, yırtıcı heyvanların əhatəsində yaşayır. Əzəmət Mikayılova gündüzlər yaxınlıqda ocaq qalayıb onun ətrafında qızınır, gecələr isə istiliyi olmayan çadırda yatır. Hadisəni işıqlandıran jurnalistlərin sözlərinə görə, həmin yerdən qayıdan zaman yaxınlıqda bir sürü çaqqal görüblər: "Çobanların deyir ki, ərazidə tez-tez canavarlar görünür. Yırtıcılar dəfələrlə mal-qaraya xəsarət yetiriblər".