BYREK ME PLENDES (Recetë nga zonja Vjollca)

"Kendi i gatimit nga zonja Vjollca ne News24 - receta 1 29 shtator 1 kg plendës të pastruar 800 gr qepë 150 ml vaj Kripë, piper i zi 8 petë të pjekura 2 petë të njoma Plëndësin e pastruar e vendosim në një tenxhere me ujë të bollshëm dhe e ziejmë derisa të ngulet piruni plotësisht. Gjatë zierjes sipas dëshirës mund t’i vendosni brenda 1 degë selino, 1 karrotë, 1 qepë, 1 thelpi hudhër dhe 1 gjethe dafine. Pasi plendësi të jetë zjerë e largojmë nga tenxherja, e ftohim pak dhe e presim hollë në copëza të vogla. Grijmë qepët shumë hollë dhe i kaurdisim me një filxhan kafeje vaj derisa ato të bëhen transparente por dhe të marrin një ngjyrë të lehtë të verdhë. Më pas shtojmë copat e plendësit dhe i kaurdisim së bashku me qepët. I rregullojmë me kripë dhe piper të zi dhe më pas shtojmë pak lëng të kulluar të zierjes së plendësit (aq sa të mbulohen qepët dhe plendësi). E lemë të vlojë për disa minuta derisa të jetë gati, të jete shteruar lëngu rreth 50 %. Spërkasim tepsinë me pak vaj dhe shtrojmë fillimisht një petë të njomë të hapur vetë, e spërkasim me pak vaj dhe mbi të vendosim një petë të pjekur të cilën e spërkasim vende – vende me pak qepë dhe plendës, shtrojmë përsëri njëra pas tjetrës 2 petë të pjekura, i spërkasim me pak vaj dhe përsëri vende-vende vendosim nga pak mbushje me qepë dhe plenc, kështu vazhdojmë në çdo 2 petë nga pak mbushje dhe në fund përsëri vendosim një petë të njomë. E spërkasim me vaj, kthejmë anët dhe e vendosim byrekun në furrë në temperaturën 200 gradë Celsius për 25-30 minuta. E lemë të ftohet 15 minuta dhe më pas e servirim të ngrohtë të shoqëruar me kos dhe dhallë.