លោក លន់ នល់ គាស់សពអាចារ្យហែមចៀវ ពីកោះត្រឡាចមកម្ពុជាវិញ

កាលពីព្រឹកថ្ងៃទី៤កក្កដា១៩៧២ ជាថ្ងៃប្រវត្តិសាស្រ្តថ្មីមួយ នៃពិធីទទួលធាតុលោកអាចារ្យ ហែម ចៀវ តាមគន្លងប្រពៃណីសាសនា បានចាត់ចែងឡើងយ៉ាងឧឡារិក ក្រោមអធិបតីនៃលោកប្រធានាធិបតីលន់ នល់ ដើម្បីផ្តល់កិត្តិយសដល់ការតស៊ូ ដែលលោកអាចារ្យហែម ចៀវ បានបូជាជីវិតជូនជាតិ។ ពិធីបុណ្យនេះបានធ្វើអោយចិត្តខ្មែររំភើប បានអង្រន់មនសិការអោយនឹកទៅដល់សំរែកឈឺចាប់ ដែលខ្មែរបានទទួលដល់ទឹកភ្នែក និងដំណក់ឈាម ដែលអ្នកស្នេហាជាតិខ្មែរបានសំរក់ដោយសារស្រលាញ់ជាតិ ខំការពារជាតិយ៉ាងមានៈ អោយបានគង់វង្សចំពោះការជិះជាន់របស់ពួកអាណានិគមនិយម ដែលពុំញញើតដៃនឹងសំលាប់បំផ្លាញបំបាត់ក្រុមបញ្ញវន្តយើង។