Tv Klan - Negociatat, shefi i policisë rrëfen se si u lirua Rozalinda

Detaje të reja janë zbardhur nga negociatat dramatike që çuan në lirimin e 24-vjeçares Rozalinda Plaka, e cila u mor peng nga ish-i fejuari i saj, Refit Buzi, pas ngjarjes tragjike në Vidhishtë të Roskovecit. Shefi i Stacionit Policor të Roskovecit, Mariglen Koroveshaj, rrëfen se negociatat me autorin zgjatën për disa orë dhe se ishte vetë Refit Buzi ai që kërkoi praninë e tij pranë automjetit ku mbante peng të renë. Sipas Koroveshajt, autori vendosi si kusht që polici të afrohej i vetëm dhe pa armë, kërkesë që u pranua me qëllim shmangien e përshkallëzimit të situatës dhe shpëtimin e jetës së pengut. “Autori kërkoi që unë të afrohesha personalisht. Më pas më kërkoi të isha i paarmatosur dhe i vetëm. E zbatova kërkesën e tij, pasi prioriteti ynë ishte të shpëtonim jetën e vajzës dhe të shmangnim çdo veprim që mund ta acaronte më tej”, tha shefi i policisë së Roskovecit, Mariglen Koroveshaj. Koroveshaj tregon se u afrua deri në rreth dy metra nga automjeti, ndërsa operacioni monitorohej në çdo moment nga forcat speciale RENEA. “Në momentin që u afrova, ai më tha të mos bëja asnjë hap tjetër, sepse do të vriste veten. U tërhoqa dhe vazhduam negociatat derisa u bë e mundur lirimi i pengut. Çdo sekondë ishte vendimtare”, tha Koroveshaj. Pas lirimit, Rozalinda Plaka ndodhej në gjendje të rënduar psikologjike dhe me dëmtime fizike, të shkaktuara gjatë rrëmbimit me forcë nga ish-i fejuari. Sipas shefit të policisë, e reja nuk ishte në gjendje të ecte, ndaj ai e mori në krahë për ta larguar menjëherë nga zona e rrezikut. Më pas, Koroveshaj u rikthye sërish pranë autorit për të vijuar negociatat, me synimin që ai të dorëzonte armën dhe situata të mbyllej pa viktima të tjera. Shefi i Stacionit Policor të Roskovecit e cilësoi këtë si momentin më të vështirë të karrierës së tij 12-vjeçare në Policinë e Shtetit. Ngjarja e rëndë ndodhi me 24 korrik në Vidhisht të Roskovecit, Buzi hyri me forcë në shtëpinë e ish-të fejuarës, duke vrarë me armë gjahu dy prindërit e saj, Kosta Plaka dhe Belere Plaka. Ai mori peng Rozalindën dhe pas disa orësh negociatash me policinë e liroi ish-të fejuarën, ndërsa refuzoi të dorëzohej duke i dhënë fund jetës me armën çifte brenda makinës. SUBSCRIBE to “RTV KLAN” on YouTube for more videos! Email: [email protected] Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/