شيلة / سهيل بان كلمات الشاعر / عبدالرحمن مطني.اداء/ صوت الشمال مفضي سعيد

سهيل بان وهب ذعذاع الانسام ماعاد فيها يالنشامى معاذير مادام راح الحر والبرد قدام تولموا ياهل المطاليع والطير على الوناسه باقيٍ عدة ايام يالله تجيب الخير في ديرة الخير نبي نشيل الطير ونسج الاقدام ونفك برقع طيرنا تالي عصير نبي نهده في طرف عرق لزام ونفرح بشوف الطير يوم انه يطير من فوق جيبٍ للمقانيص عزام اليا انطلق ثارت وراه المعاصير من وارد النيسان معشوق الاعلام جيبٍ سفاري للوجيه المسافير انا اشهد انه صدق مركوب حكام مايركبه غير الرجال المناعير في فيضةٍ ماطبها راع الاغنام ماطبها غير النياق المغاتير خبري بها بالوقت هذا من العام يوم الزبيدي في طرفها مزابير المشي فيها طبٍ لكل الالام لاصرت فيها ماتجيك التفاكير سبحان ربي كنها رسم رسام ماكنها الا من ولايات كشمير فيها النفل ومربع اشكال واقسام وريحى الخزامى فيه فوق التصاوير مع خوةً سنعين ورجالٍ كرام روس الرجال الطيبين المغاوير اللي معزتهم على دين الاسلام معزه ..وفزعه ..وخوه ..وتقدير الى اجتمعتوا بالمساء ربعٍ حشام في وسط قاعٍ جوه مغيم وغير من فوق نار بالحطب تشعم اشعام ودلال رسلانٍ عليها مباهير فنجالها لاسيق ينسيك الاوهام مع السوالف والبيوت النوادير في روضة خضرا تباها بالانعام تسوى حياة مجمعين الدنانير هذا هو المطلوب في باق الايام قبل الوداع وقبل نرحل على خير الشاعر/ عبدالرحمن مطني