Hər gün ZƏNCƏFİL ÇAYI içsək nə olar?

#BirBax #xalqtəbabəti #zəncəfil Yeməklərə ləzzət qatan ədviyyat tibbi məqsədlərlə də istifadə edilir. Bir çox xəstəliklərin müalicə və profilaktikasında zəncəfilə üz tutulur. Qoxusu tünd, dadı acıdır. İndi isə keçək, zəncəfilin istifadəsinə... Yeməklərə qatılır. Qabığı soyulmuş təzə zəncəfili sürtgəcdən keçirərək, yaxud dilimləyərək, toz halındakı zəncəfili isə eynilə başqa ədvalar kimi yeməklərə əlavə etmək mümkündür. Zəncəfilli çay. İsti suya qabığı soyulmuş təzə zəncəfil dilimləri və ya zəncəfil qurusu atın, dəmləyin. Soyuqdəymənin qənimi zəncəfilli çay hazırdır! Zəncəfilli içki. Soyuq suyun içinə qabığı soyulmuş təzə zəncəfil dilimləri atın və ağzını örtərək gözlədin. 30-40 dəqiqədən sonra zəncəfilli suyu içə bilərsiniz. Toz halındakı zəncəfili qaynar südə qataraq içmək faydalıdır. Xəmir xörəkləri və ya şirniyyatlar. Çörək, piroq, içli çörək, qurabiyə kimi xəmir məmulatlarına toz halındakı zəncəfildən qatmaq mümkündür. İçli xəngəl, əzmə xəngəl, ədvalı əriştə kimi yeməklər hazırlayarkən toz halındakı zəncəfildən xəmirə əlavə etməklə mətbəxinizdə qeyri-adi dad və sağlam qida əldə etmək şansınız var. Məcunlar. Bal, limon, darçın, mixək və zəncəfil dilimlərini qataraq immunitetinizi gücləndirəcək məcunlar hazırlaya bilərsiniz. Məcunları olduğu kimi, hər səhər acqarına 1 çay qaşığı olmaqla, ya da nahardan əvvəl-ikinci qəlyanaltıda suya qataraq qəbul edə bilərsiniz. Souslar. Krem pendirin, limon suyunun, tərəvəz şirələrinin içinə toz halındakı zəncəfil qatmaqla dadlı souslar hazırlamaq dünya mətbəxinin qədim ənənələrindən sayılır. Məsələn; vasabi suşinin ən yaxşı müşayiətçisidir. Qida əlavələri. Zəncəfilli kapsul, zəncəfilli pastil, zəncəfilli siroplar həkim məsləhətiylə qəbul edilsə, yaxşı olar. Çünki hər biri orqanizmin ehtiyacına görə seçilir. Aromaterapiya və kosmetologiya. Zəncəfil yağı ilə masaj edilir, otağın qoxusu dəyişilir və sair... Zəncəfilli krem, zəncəfilli şampun isə kosmeteoloqların və ya dermatoloqların tövsiyəsi ilə istifadə edilir. Dünya mətbəxində zəncəfil ədva kimi daha məşhurdur. Müxtəlif ölkələrdə onu toyuq ətinin, mal ətinin, balıqların, hətta tərəvəzlərin bişirilməsində istifadə edirlər. Xüsusilə, hindlilər zəncəfilsiz, demək olar ki, heç nə bişirmirlər. Şorbalarının əksəriyyətinə zəncəfil qatan hindlilər plov və ya makaronlar üçün souslarında da ədvanı unutmurlar. Sobada ət söte bişirərkən 1 çay qaşığı toz zəncəfil vura bilərsiniz. Tərəvəz şorbalarına iştahaçıcı qoxu və dad verən zəncəfili salat souslarına qatmağı təxirə salmayın. Zəncəfilli çayın dadını sevə bilməsəniz, ona da çarə var. Stəkana 1 çay qaşığı bal və yarım limonun suyunu əlavə etsəniz, mükəmməl qış içkisi əldə edəcəksiniz. Soyuqdəymə, qrip, öskürək kimi mövsümi xəstəliklərin “ən təbii dərmanlar”ından biri məhz zəncəfildir. Mineral suyu, sürtgəcdən keçirilmiş təzə zəncəfili, doğranmış nanəni, sıxılmış limon suyunu, sürtgəcdən keçirilmiş portağal qabıqlarını bir-birinə qatın. Qarışımı yarım litr suyun içində 1,5-2 saat gözlədin. Sonra cuna ilə süzün. Alınan içkinin içinə buz və ya mövsümi təzə meyvələrin dilimlərini, giləmeyvələrin dənələrini ataraq servis edə bilərsiniz. Dünya mətbəxinə nəzər salsaq, görərik ki, xəmir xörəklərinə dilimlənmiş, yaxud sürtgəcdən keçirilmiş zəncəfil əlavə edilməsi halları mövcuddur. Lakin usta aşpazlar bunun estetik olmadığı fikrindədir. Onlar xəmirə toz halındakı zəncəfildən əlavə edilməsi tərəfdarıdırlar. Səbəb kimi isə təzə zəncəfilin xəmirin içindən ip kimi çıxdığını göstərirlər. Soyuq qış günlərində quru öskürək “çağırılmamış qonaq” olmaqda israrlıdır. Boğazdakı qıcıqlanma, halsızlıq, yorğunluq zamanı təzə zəncəfildən hazırlanmış məcun əlçatan vasitəyə çevrilir və problemi həll edir. Limon, bal, darçın, mixək və zəncəfili bir-birinə qataraq əldə edəcəyiniz məcunu isti suya əlavə edərək 7 yaşdan yuxarı uşaqlara da içirə bilərsiniz. Məcunun daha qatı halı isə pastillərdir ki, qış aylarında ağıza qoymaqla nəfəs yollarındakı tıxanıqlıqlardan yaxa qurtarmaq olar. Zəncəfili çiy-çiy də yemək olar. Qabığını soyun, nazik dilimləyin, ən əsası, bütün cəsarətinizi toplayın. Axı zəncəfil acıdır. Zəncəfil dilimlərini duru bala batıraraq yeyənlər də var. Zəncəfil nə qədər az istiliyə məruz qalsa, o qədər faydalıdır. Məsələn; zəncəfil çayının dəmlənməsi üçün qaynayan su və 5 dəqiqə yetərlidir.