Thlierbik Neilo | EFCI Central Choir [2022-2023]

Unauthorized reproduction is strictly prohibited. THLIERBIK NEILO Hi hla 'Thlier bik neilo' hung suok dan chu. Kum 2013 lai khan Kolasib District Choir (khang hun lai khan District ti a ei lan khai lai anih) lak tharna kan nei a, Chuonglai chun Choir Secretary ka ni nghe nghe a. Chuong kan in lak thar lai chun mi pathum, pali vel lai chu mi haiin iemata a ma chu in laka, a umdan hai in hriet naw a ni tiin mi iemani tawk chun an mi suosal a. Hril ding khawm ka hrietnaw a, ka lungril khawm a na a... Chuonglai chun, Lalpa i rawngbawl dinga i ko hai hin, tlina felna hrim kan nei si naw a, Mihriem hai, Khawvel inkhina anga inkhi lem chun i rawngbawl tlak hrim kan um naw a nih. Lalpa i hnung kan zuina kawng tinrenga hin hrilsietna hai, Hmusitna, Ṭapna hai chen khawm kan la tuok pei ding ana, chuong huna khawm chun Mi ṭhuoitu Thlarau danglam ngailo khan mi ṭhuoi pei raw aw tiin ka ṭawngṭai a, chu ka Ṭawngṭaina thu chu ka Ṭawnṭaina thu chu ziek suokin, kan Conductor Pu HL Lawmkung ka peka, aman a Thlûk hung siemin, Keini Choir hai khawm chun hi hla hi sakin kan hlimpui ve hlak a, hun hung fe peiin sak sunzawmin a um ta naw a. Kum 2022 Kumtir tieng khan hi ka hla phuok hin ka lungril a hung dengthar nawk rieu a, Chang 4 na 'Hnuoi mi hai enin tlinna nei naw langkhawm, Lalpa a chun thlamuongna kim ka nei, Khawvel thiemna varna insangna hai hi, Chatuon tling zo ding an um si naw' ti hi a hung in lang sa nawk a. Kan ngirhmun ka ena EFCI Central Choir meu ni ding chun, Thiemna varna kan nei naw a, Kan khawsakna hai hlak in mi kan phaknaw a, tlingnaw kan in ti hle el a. Amiruokchu hi Hnuoi mi hai enin tlinnaw in lakhawm, Thiemna varna hai neinaw in lakhawm, Lalpa a chun Thlamuongna kim nei tu hai kan ni leiin, mi vangnei chungchuong kan ni ti hi a ka hriet a. In thlahrung tak pumin hi hla hi zieksuok in kan Director Upa Joseph L Hmar hi ka peka, Choir in ei inchuk kher ding ni loin, hi hla hi a sawt ta a, a thlûk khawm a umsa ta a, anachu a thlûk hi sukdanglam in mi hung siem pek ta la ka ti a, a hung siem ta ngei a. Ka beisei phaklo in Central Choir in an min chûkpui nawk ta pei a. Lungril takin ka lawm hle a nih. Iengkim hi Pathien remruot le Pathien thilthaw vawng a nih. Pathien hin a rawngbawl ding le, a hnung zui ding hin, Thlier bik a nei naw a. Mi thiem mi var khawm a thlang chuong bawk nawh. Ama tadinga in pe le ama a in nghat ngamtu hai hi a lo thlang hlak lem a nih. Lalpa ropui raw se.