نسايم أشواقي... عثمان اليمني

نعالج القبح بالجمال.. ــــــــــــــــــــــــــــــــــــ نسايم أشواقي ــــــــــــــــــــــــــــــــــــ كلمات: إبراهيم إبنعوف ــــــــــــــــــــــــــــــــــــ فسراع يانسايم أشواقـي ودنلـي السـلام مطبـوق لي أهلنا وجميع حبانـا فـي الحلـي التحـت والفـوق **** هبي علي الشمال تلقيه المال فـوق جريـده يتـوق يتراقص مـع نغمـات قماريـه التسـوي القـوق بي طيبة الحنان يلقـاك يهـش ليـك ويطـول ليفـوق ويكتر في السلام يقلد مثـل عاشقـا لقى المعشـوق **** هناك ساقةً محاضنة النيل تدفق فـي دمـوع الشـوق تتبكى وتبكي الـزول وكـت نـص الليالـي تسـوق باري جديولها أطلعي فوق وشوفي دحين شنو المسيوق وبعدين بي بشيشـك لفـي قدّامـك شتيـل مكـروق *** داك مالي الرحل مندلي جايـب للخضـار مـاروق وداك بدر يحش في قشو عجلان باقي شايل السوق وداك قرع مقرن مويتو فتـران دار شـوي يـروق عشان يفتل حبيل يربطبـو قادوسـا نعـس مطلـوق *** ديل أهلي الحنان يا نسمـة بهديهـم سلامـي وشـوق طول داير ازورهـم مـرة إلا قديمـي ..مامطلـوق وإن سالوكي عن أحوالي البـي ما يصيـب مخلـوق تاهـت بـي مراكـب الغربـة لا ريـس ولا واسـوق **** والدرب المسافر بيهو من طولـه بتهابـو النـوق !! خمس سنين قعد في ظلامه ما بان لي صباحو شروق أساهر الليل مـع الباكنـوا ينجـارى الدمـع سبلـوق وأبكي علي الزمان الفات وما أظن البفـوت ملحـوق *** انسلب اللحم من جسمي وأصبح تب عضام وعـروق أما قليبـي لو شوفتوهوا بـي سيف الغـرام مشقـوق لا لاقي البحـن فـي حالـي ولا زولا علـي شفـوق وإن بقي عاد دي حالتي البي ما إظن للسعادة اضـوق ……….. إنا لله ياخ