Merr detyrën komandanti i ri i Policisë Ushtarake

Në mjediset e Policisë Ushtarake u zhvillua ceremonia ushtarake për dorëzimin dhe marrjen e detyrës së komandantit të Policisë Ushtarake. Në këtë ceremoni ishin të pranishëm ministri i Mbrojtjes znj. Mimi Kodheli, shefi i Shtabit të Përgjithshëm të FA gjeneralmajor Jeronim Bazo, zëvendësministri i Mbrojtjes z. Petro Koçi, gjeneralë, ish - komandantë dhe titullarë të MM/SHPFA. Ministrja Kodheli pasi prezantoi kolonel Arben Kingjin në detyrën e re të komandantit të Policisë Ushtarake, tha se jam e bindur se komandant Kingji jo vetëm do të dijë të drejtojë ashtu si paraardhësi i tij, por do të mundësojë me mbështetjen time si ministër i Mbrojtjes, me mbështetjen e gjeneral Bazos dhe të gjithë strukturave të tjera drejtuese të FA dhe MM, të çojmë përpara këtë strukturë elitë të FA. “Kam besimin e plotë se do të vijë dita kur e gjithë struktura juaj dhe jo vetëm një pjesë, të mund të jeni jo vetëm pjesë aktive ashtu siç ju jeni brenda FA, brenda vendit, por një pjesë aktive në front të parë të të gjithë misioneve dhe operacioneve paqeruajtëse, trajnuese nën ombrellën e NATO kudo në botë”, - theksoi ministrja Kodheli. Më tej, nëpërmjet një ceremoniali ushtarak, flamuri i Policisë Ushtarake, i cili mban me krenari medaljet e ndryshme për arritje të larta gjatë viteve, u dorëzua me nder nga kolonel Xhevdet Zeneli tek gjeneralmajor Jeronim Bazo, i cili ia besoi këtë flamur komandantit të ri të Policisë Ushtarake, kolonel Arben Kingji. Gjatë fjalës së tij të lamtumirës kolonel Zeneli shprehu se “Gjatë 40 viteve të karrierës në FA kam patur privilegjin por edhe përgjegjësinë për të kryer një sërë detyrash, ju jam mirënjohës dhe përulem me respekt para të gjithë jush me të cilët pata nderin të punoj e bashkëpunoj gjatë këtyre viteve. Është privilegj të jesh pjesë e ceremonive të tilla, por nuk do të kisha dashur të isha në këtë të sotmen, pasi nuk është e lehtë të ndahesh asnjëherë nga profesioni”, më tej kolonel Zeneli i vendosi në uniformë kolonel Kingjit stemën e Policisë Ushtarake, me besimin për të ruajtjen dhe çuar sa me lartë emrin e Policisë Ushtarake. Ndërsa gjatë fjalës së tij, nëpërmjet një “maksime të njohur”, gjeneral BAZO theksoi se “një njeri në dallim nga të tjerët nuk e bëjnë të ndershëm e të suksesshëm postet, uniformat e bukura, apo gradat për ushtarakët. Janë vlerat dhe virtytet, dinjiteti dhe integriteti që mbart e përcjell secili nga ne, që na bëjnë të vlefshëm e përherë të respektuar.- I tillë është kolonel Xhevdet Zeneli”. Të pranishmit në ceremoni, realizuan një foto të përbashkët, si një kujtim i bukur i kësaj ngjarje të shënuar jo vetëm për PU, por për të gjithë Forcat e Armatosura Shqiptare.