မြဝတီမှာ ဆန္ဒပြသူတွေကို KNU တပ်ဖွဲ့ဝင်တွေဝန်းရံစောင့်ရှောက်

မြဝတီမှာ ဆန္ဒပြသူတွေကို KNU တပ်ဖွဲ့ဝင်တွေဝန်းရံစောင့်ရှောက် ဖေဖေါ်ဝါရီ - ၂၁၊ ၂၀၂၁ မြဝတီမြို့မှာ ကေအန်ယူတပ်ဖွဲ့ဝင်တွေ လိုက်ပါစောင့်ရှောက်ဝန်းရံပေးတဲ့ ဆန္ဒပြပြည်သူလူထုသပိတ်စစ်ကြောင်းကို စစ်တပ်နဲ့ရဲတပ်ဖွဲ့က တားမြစ်ပိတ်လိုက်ပေမယ့် ညှိနှိုင်းမှုတွေ လုပ်ဆောင်ပြီးတဲ့နောက် လမ်းပြန်လည်ဖွင့်ပေးခဲ့တယ်လို့ သတင်းရရှိပါတယ်။ ကရင်ပြည်နယ် မြဝတီမြို့မှာ စစ်အာဏာရှင်ဆန့်ကျင်ရေး ဆန္ဒပြပွဲအဖြစ် မြဝတီမြို့နယ် တောင်ဘက်ပိုင်းနဲ့ မြောက်ဘက်ပိုင်းက ကရင်ပြည်သူလူထုတွေဟာ ဒီကနေ့မနက်မှာ မြို့ပေါ်ကို တက်ရောက်ပြီး လာရောက်ဆန္ဒ ဖော်ထုတ်ခဲ့တာပါ။ အဲ့ဒီလို ဆန္ဒဖော်ထုတ်ဖို့ လာရောက်တဲ့ ပြည်သူလူထုသပိတ်စစ်ကြောင်းကို ကေအန်ယူလက်နက်ကိုင်အဖွဲ့က လာရောက်ဝန်းရံပေးခဲ့တယ်လို့ ဆန္ဒပြပွဲမှာ ပါဝင်တဲ့ လူငယ်တစ်ဦးက ပြောပြပါတယ်။ ကျေးရွာတွေကနေတက်လာတဲ့ ဆန္ဒပြ ပြည်သူလူထုသပိတ်စစ်ကြောင်းကို ကေအန်ယူတပ်ဖွဲ့ဝင်တွေက မြဝတီမြို့အနီးနားအထိ လိုက်ပါစောင့်ရှောက် ဝန်းရံပေးခဲ့ပြီး စစ်တပ်နဲ့ ရဲတပ်ဖွဲ့က နေရာ ၃ နေရာမှာ လမ်းပိတ်ကာ တားမြစ်လိုက်တာပါ။ ဒါပေမယ့် ဆန္ဒပြပြည်သူလူထုနဲ့ ရဲတပ်ဖွဲ့ဝင်တွေရဲ့ ညှိနှိုင်းပြောဆိုမှုကြောင့် လမ်းပြန်လည်ဖွင့်ပေးလိုက်ပြီး မြဝတီမြို့ထဲအထိ ဆက်လက်ချီတက်ဖို့ ခွင့်ပြုပေးလိုက်တာဖြစ်ပါတယ်။ မြဝတီမြို့ မြောက်ဘက်ပိုင်းက သပိတ်စစ်ကြောင်းနဲ့ တောင်ဘက်ပိုင်းက သပိတ်စစ်ကြောင်းဟာ မြို့ထဲအထိ ချီတက်ဆန္ဒဖော်ထုတ်ခဲ့ပြီးတဲ့နောက် ရဲတပ်ဖွဲ့ရုံးရှေ့နဲ့ ခရိုင်အုပ်ချုပ်ရေးမှူးရုံးရှေ့မှာ တစ်ပတ်ကြာ ပိတ်ပင်ထားတဲ့ ဘုရင့်နောက်လမ်းမကြီးကိုလည်း ပြန်လည်ဖွင့်ပေးခဲ့တယ်လို့ သိရပါတယ်။ အဲ့ဒီနောက် သပိတ်စစ်ကြောင်းတွေဟာ ပူးပေါင်းလိုက်ပြီးတဲ့နောက် မြဝတီမြို့ကို လှည့်လည်ပြီး ဆန္ဒဖော်ထုတ်ခဲ့ကြတယ်လို့ သိရပါတယ်။ Subscribe to our channel at https://bit.ly/2CVSP6d Check out our website: http://www.7daydaily.com/ Connect with us at our social media handles: Facebook:   / 7dayonlinetv   Twitter:   / 7day_tv