MVOMERO KUWAKUTANISHA WADAU WA SEKTA YA MISITU KUWEKA MIKAKATI YA UHARIBIFU WA MAZINGIRA

Wilaya ya Mvomero inatarajia kuwakutanisha wadau wa sekta ya misitu katika kikao maalum kitakacholenga kujadili changamoto zinazoikabili sekta hiyo na kuweka mikakati madhubuti ya kukabiliana na uharibifu wa misitu unaosababishwa na shughuli za binadamu ikiwemo kilimo kwenye maeneo ya hifadhi pamoja na athari za mabadiliko ya tabianchi. Hayo yamebainishwa Mei 14, 2026 na Mkuu wa Wilaya hiyo Mhe. Maulid Hassan Dotto Wakati wa ziara ya kutembelea Shamba la Miti Mtibwa ikiwa ni muendeleo wa ziara ya kutembelea maeneo ya hifadhi za misitu kujionea rasilimali na hali ya uharibifu katika maeneo hayo, katika ziara hiyo Mkuu wa Wilaya ameambatana na wajumbe wa Kamati ya Ulinzi na Usalama ya Wilaya. Mkuu huyo wa Wilaya ameeleza kuwa baada ya zoezi la kutembelea na kukagua maeneo ya hifadhi za misitu ataitisha kikao cha wadau wa sekta ya misitu ambacho kitawakutanisha wataalamu wa misitu, viongozi wa serikali za vijiji vinavyozunguka maeneo ya hifadhi, viongozi wa wakulima, wafugaji pamoja na wadau wa mazingira kwa lengo la kujenga uelewa wa pamoja na kuimarisha usimamizi endelevu wa rasilimali za misitu.