MKULIMA TARIME ASIMULIA ANAVYOINGIZA MAMILIONI YA PESA KUPITIA KILIMO IKOLOJIA.

Katika kijiji Kewamamba Kata ya Kiore wilayani Tarime mkoani Mara, mkulima Nuhu ameendelea kuwa mfano wa mafanikio kupitia kilimo ikolojia na uzalishaji wa mbegu za asili zinazowasaidia wakulima wengi ndani na nje ya jamii yake. Kupitia kilimo hicho, Nuhu huzalisha mazao mbalimbali ya asili pamoja na mbegu anazowagawia na kuwauzia wakulima wengine ili kuwahamasisha kutumia mbegu salama na zinazotunza mazingira,ambapo mpaka sasa ameshawapatia mbegu za asili wakulima zaidi ya mia tano katika kijiji chake na maeneo ya jirani. Nuhu amesema kilimo ikolojia kimembadilishia maisha kwa kiasi kikubwa kwani mbali na kulisha familia yake chakula safi na salama kisicho na kemikali,kulinda mazingira,pia kimemwezesha kusomesha watoto wake, kujenga nyumba nzuri ya kuishi na kuboresha maisha ya familia yake kwa ujumla. Mkulima huyu hutumia mbolea za asili kama samadi badala ya pembejeo za viwandani ili kulinda afya ya udongo na mazingira. Kupitia mauzo ya mazao ya kiikolojia anayolima, Nuhu anaingiza zaidi ya shilingi milioni kumi kila mwaka, jambo ambalo limekuwa chachu kwa wakulima wengine kuanza kuona thamani ya kilimo kinachozingatia afya ya binadamu na uhifadhi wa mazingira. Mbegu za asili anazozalisha pia zimeendelea kusaidia wakulima wengi kupata mazao bora na endelevu. Nuhu pia amekishukuru Kituo cha Mogabiri kilichopo wilayani Tarime pamoja na mradi wa Agro Kilimo unaoratibiwa na taasisi ya IDP kwa kumpatia elimu ya kutosha kuhusu kilimo ikolojia na kumkutanisha na wakulima wengine ambapo ameweza kujipatia ujuzi zaidi. Aidha Bwana Nuhu ametoa wito kwa wakulima wengine kujikita katika kilimo ikolojia ili waweze kunufaika kiafya,kiuchumi na kutunza mazingira. #agroecologyrightnow #sustainablefoodsystems #organic #smartfarming