«Երկրորդ շնչառություն». Ֆիզիկական ակտիվությունն առողջ երկարակեցության հիմքն է 26.07.2026

60-ից հետո էլ մարդը կարող է առողջ ու գեղեցիկ լինել, եթե ճանաչի իր օրգանիզմը, չզլանա ջանքեր գործադրել սեփական մարմինը խնայելու և ամեն օր կատարելագործելու ուղղությամբ: Սկզբի համար հարկավոր է ճիշտ շնչել սովորել, առողջ սնվել ու տնային պայմաններում որոշակի վարժություններ կատարել։ Սրանք բուժական ֆիզկուլտուրայի վաստակաշատ մասնագետ Աիդա Աղաջանյանի խորհուրդներն են. նա 83 տարեկանում ամեն օր աշխատում է «Տիգրան Մեծ» առողջության կենտրոնում՝ 7 ամսականից մինչև 70 տարեկան բուժառուների հետ: «Մեծահասակները մեծ երեխաներ են, բոլորն էլ եղել են թիթեռնիկի պես առույգ ու թռվռան, բայց հետագայում, երբ արդեն 60-ն անցնում են, և ի հայտ են գալիս որոշակի առողջական խնդիրներ, թվում է, թե կյանքն ավարտված է»,- ասում է տիկին Աիդան՝ համոզմունք հայտնելով, որ թոշակի անցնելուց հետո գալիս է երանելի ժամանակ, երբ երեխաներն արդեն մեծ են, հոգսերը քիչ են, և ազատ ժամանակ կա զբաղվելու սեփական անձով: Տիկին Աիդան առողջ ու երկար կյանքի իր գաղտնիքը համարում է աշխատանքը, դրական մտածողությունն ու բալանսավորված կյանքը: «Քանի դեռ ապրում ես, պետք է օգտակար լինել մարդկանց: Եթե չեք կարող օգնել մյուսներին, գոնե ինքներդ ձեզ օգնեք ու առողջ եղեք»,- եզրափակում է բուժական ֆիզկուլտուրայի մասնագետը: