რა როლს ასრულებს AI-ს ქართულ სამუშაო ბაზარზე?

გასული კვირის ბოლოს კომპანია Amazon-ის დამფუძნებელმა, ჯეფ ბეზოსმა პარიზში გამართულ ტექნოლოგიურ კონფერენციაზე სამუშაო ძალაზე ხელოვნური ინტელექტის გავლენის შესახებ ოპტიმისტური პროგნოზი წარადგინა. ბიზნესმენის განცხადებით, ტექნოლოგიების განვითარება დასაქმებულთა მასობრივ ჩანაცვლებას არ გამოიწვევს, პირიქით, მისი შეფასებით კადრების დეფიციტი გაჩნდება. ბეზოსმა აღნიშნა, რომ ის საზოგადოებაში არსებულ შიშებს არ იზიარებს, რადგან AI იდეების რეალიზების პროცესს დააჩქარებს, ადამიანების შესაძლებლობებს გააფართოებს და ახალი ბიზნესების შექმნას შეუწყობს ხელს. "კაცობრიობა ამჟამად საკუთარი წარმოსახვით უფროა შეზღუდული, ვიდრე რეალური შესაძლებლობებით, ტექნოლოგიური პროგრესი კი ამ ბარიერებს სრულად მოხსნის" - განაცხადა ბეზოსმა. მნიშვნელოვანია ითქვას, რომ მიმდინარე წლის მაისში ტექნოლოგიურმა სექტორმა 38,242 სამუშაო ადგილი გააუქმა, რაც 2024 წლის აგვისტოს შემდეგ ყველაზე მაღალი მაჩვენებელია. წლიურ ჭრილში კი ინდუსტრიაში სულ 123,653 პოზიცია შემცირდა, რაც 2025 წლის ანალოგიურ პერიოდთან შედარებით 66%-იან ზრდას ნიშნავს. ტექნოლოგიურ გიგანტებს შორის, რომლებმაც AI-ში ინვესტიციების ფონზე შტატები შეკვეცეს, თავად Amazon-იც არის, რომელმაც მხოლოდ იანვარში 16,000 თანამშრომელი გაათავისუფლა. კომპანიის მენეჯმენტი ამ ნაბიჯს ბიუროკრატიის შემცირებისა და რესურსების ინოვაციურ პროექტებში გადამისამართების სურვილით ხსნიდა. რა ხდება ადგილობრივ შრომის ბაზარზე? სტუმარი: მედეა ტაბატაძე - საკონსულტაციო და რეკრუტინგული კომპანია Insource-ი, მმართველი პარტნიორი;