2024 Easter Family Gathering #4 Paris - Giverny Outlet - Le Hevre Port - Portsmouth - Stonehenge

最後兩日行程，回程船安排在 Le Hevre Port 晚上9:15開船，有足夠時間去多一兩個景點。 在 Sarah 家食埋 Lunch 約一點出門口，大約 2:30 就到 A13 公路旁邊嘅 Giverny Outlet，星期四中午個Outlet 唔係好多人，一般大牌子都有，Nike、Adidas、New Balance樣樣齊，有在巿中心經常見到嘅 Amorino 雪糕店，唔少得Le Creuset 港女煲啦... （全店特價指定顏色再有折扣，本來加埋退稅就超級抵）。Outlet 有間好耐無見過嘅砌圖專門店，特價貨真係平，入了三盒回家慢慢砌。離開前到 Custom service 辦退稅手續，佢提了我地，要在港口找退稅機 scan QR Code，我地一心諗住在港口可以退稅，結果係無嘅。 Outlet 內有餐廳但有點貴，開了約四十五分鐘到下一個休息站，約四點半開餐。 再經 A131 公路往 Le Hevre City，往碼頭的指示都清楚 （跟住綠色路牌，有英文FERRY指示）。約六點半就到了碼頭。 原本諗住碼頭有退稅機，但在碼頭找了一輪都無，問下職員，原來要在第一關過 check in 時，就要俾份退稅表俾職員打個印，再email 返去法國稅局才可退稅，回家再 check ，原來真係唔係個個港口（或陸路）都有退稅機。 上船後找到房間，原來係兩間房共用一個洗手間，間房都幾闊落，有枱有櫈，床都幾舒服。今次隻船比去程隻船細咗D，但可以到甲板上看風景，開船前都未天黑，Le Hevre 港口環境都幾靚。 行行下船，到半夜會在海中心停一停，等天光再出發往 Portsmouth。 5:45 有morning call，可以欣賞埋個日出。約七點準時停泊在 Portsmouth，落船過關都順利，終於回到了右軚車嘅世界。 回家北上時，順路去了 Stonehenge 巨石陣行一轉，窮遊無俾錢就要用腳行30分鐘去巨石陣影張相，再行返30分鐘去停車場。 連埋午餐和休息，再花多五個鐘約六點才回到利物浦。