மஹாகும்பாபிஷேக திருக்குட நன்னீராட்டுப் பெருவிழா - 26.05.2026(ஏழாம் நாள் காலை)

அருள்மிகு மீனாட்சி அம்பிகை உடனுறை சொக்கநாதப்பெருமான் திருக்கோயில் வெளிச்சநத்தம், வெ. மீனாட்சிபுரம், மதுரை மாவட்டம். மஹாகும்பாபிஷேக திருக்குட நன்னீராட்டுப் பெருவிழா அழைப்பிதழ் 'முளைத்தானை எல்லார்க்கும் முன்னே' தோன்றி என்ற அப்பர் பெருமானின் வாக்கிற்கிணங்க மதுரையம்பதி, ஜீவன்முக்திபுரம், த்வாதசாந்தம், திருஆலவாய், கன்னி நகரம், சிவராஜதானி, பூலோக கைலாசம் போன்ற பல நாமங்களைக் கொண்ட மதுரையம்பதியிலே அங்கயற்கண்ணி உடனாக ஆலவாயண்ணல் ஸ்வயம்புலிங்கமாகத் தோன்றி வீற்றிருந்து அருள்பாலித்து வருகின்றார். ஜீவன்களின் மேல் கொண்ட பெருங்கருணையினால் 64 திருவிளையாடல்கள் புரிந்து எம்பெருமான் நமக்கு அனுக்ரஹம் செய்து வருகின்றார். இத்தலத்தினுடைய நேர்ஈசானபாகத்திலே அமைந்துள்ள வெளிச்சநத்தம், மீனாட்சிபுரம் எனும் கிராமத்தில் இறைவனுடைய திருவருளினாலே தர்பை புதருக்குள் சிவலிங்கத்திருமேனியும் சைவ முதற்குருவாம் நந்தியெம்பெருமானின் திருவுருவமும் கண்டெடுக்கப்பட்டன. தர்பை புதருக்குள் அருள்பாலித்துவந்த அந்தத் திருமேனியானது கண்ணுக்கு இனிய பொருளாகி நமது கைமேல் வரப்பெற்றது நாம் செய்த புண்ணியப் பயனே என்றால் மிகையாகாது. மேலும், பாலாலயத்தின் போது கலாகர்ஷணம் செய்தது முதல், அந்த கும்பத்தை பாலபிம்பத்தில் அபிஷேகம் செய்யும் வரை, அன்று இரவு முழுவதும் இடைவிடாது மழை பொழிந்தது. இந்நிகழ்வு பெருமானின் அருள்பரிபூரணமாக இருப்பதைக் உணர்த்துகிறது. இவ்வாறாக தர்பை புதருக்குள் நம்கண்ணுக்கு இனிய பொருளாய் வந்த அப்பெருமானுக்கு ஸ்ரீ சுந்தரேசுவரர் என்ற திருநாமத்தையே சூட்டி மிகச் சிறப்பாக கருங்கல்லினாலே புதிய திருக்கோயிலானது எழுப்பப்பெற்று பொன்னம்பலம் மற்றும் வெள்ளியம்பலம் ஆகிய சபைகள், விநாயகர் முதலான பரிவார சன்னிதிகள் ஆகியவற்றோடு சீரோடும் சிறப்போடும் விளங்குகின்றது. இத்திருக்கோயிலின் மஹாகும்பாபிஷேகப் பெருவிழாவானது நிகழும் மங்களகரமான ஸ்ரீபராபவ வருஷம் வைகாசி மாதம் 14ம் தேதி (28.05.2026) வியாழக்கிழமை த்வாதசி திதியும், சித்திரை நக்ஷத்ரமும், சித்தயோகமும் கூடிய சுபயோக சுபதினத்தில் அன்று காலை 7.45 மணிக்கு மேல் 9.00 மணிக்குள் மிதுன லக்னத்தில் சித்தாந்த சைவ ஆகமங்களின்படி தமிழகத்தின் தொன்மையான ஆதீனத்திருமடங்களின் அதிபர்கள், ஆன்மீகப் பெரியோர்கள் ஆகியோரின் முன்னிலையில் மிகச் சிறப்பாக நடைபெறவிருக்கிறது. பக்தகோடிப் பெருமக்கள் அனைவரும் மஹாகும்பாபிஷேக விழாக்களில் திரளாகக் கலந்துகொண்டு எல்லாம்வல்ல ஸ்ரீ மீனாட்சி அம்பிகை உடனுறை ஸ்ரீசொக்கநாதப்பெருமானுடைய பேரருளைப் பெற்றுய்யுமாறு அன்போடு வேண்டி கேட்டுக்கொள்கிறோம்.