EKSKLUZIVE/'Nuk e njoh fare Artur Shehun', Alaudin Malaj: Kam bërë gjyq për trashëgimtarët e pronës!

Ish-kreu i Gjykatës së Apelit, Alaudin Malaj, i ftuar këtë të martë në studion e “Quo Vadis” të moderatores Pranvera Borakaj në Vizion Plus, ka folur për Zvërnecin, ku emri i tij është lidhur ngushtë ditët e fundit pas nisjes së protestave. Malaj tha se ai ka dhënë një vendim trashëgimie për Zvërnecin në vitin 2013, por është i bindur se nuk e ka shkelur kurrë ligjin dhe i ka qëndruar strikt. I pyetur nga moderatorja Borakaj nëse ka njohje personale me ndonjë nga trashëgimtarët e familjes për të cilën dha vendimin, Malaj e mohoi, duke thënë se ai ka qëndruar gjithmonë larg Vlorës, edhe pse ka familjen e tij që jeton atje dhe merret me biznes prej vitit 1990. Pjesë nga biseda: Borakaj: Çfarë dini ju për Zvërnecin? Malaj: Problemi është politik. Për shkak të detyrës që kam pasur, jam etiketuar sikur isha i PD-së, jo i PS-së. Janë probleme që ndodhin rëndom në Shqipëri, me të njëjtat resurse. Problemi është që, me sa kuptova në këtë procedurë, unë kam punuar 30 vjet gjyqtar, dhe nga 350 vendime në vit janë shumë. Do më pyesni nëse kam dhënë një vendim në 2013 për Artur Shehun? Unë nuk e njoh fare, e kam parë vetëm në TV. Borakaj: S’e keni takuar fare? Malaj: Ua thashë, unë jam nga Fieri, vetëm gjimnazin kam bërë në Vlorë. Prindërit e mi kanë një biznes ndërtimi që nga viti 1990. Unë nga Vlora jam shkëputur në vitin 1989. Po pse më lidhin me Vlorën? Vetëm për çështje politike. Unë isha kryetar i Gjykatës së Apelit, nuk i hapa rrugë qeverisë së majtë. 30 vjet si gjyqtar mësova një gjë: të jem i drejtë me veten time, i pastër dhe i pavarur nga njerëzit. Këndvështrimi im si gjyqtar nuk ka qenë si ai i kolegëve të mi, ka qenë më përparimtar. Borakaj: Çfarë do të thotë? Malaj: Unë kam qenë shumë i sigurt në vendimmarrje, asnjëherë i dyshimtë. Borakaj: Ju më thatë se keni marrë 350 vendime në një vit, janë shumë për t’u mbajtur mend të gjitha. Jeni bërë kurioz t’u riktheheni atyre vendimeve? Malaj: Gazetaria investigative shkruan për një vendim të vitit 2013. Mund të kem bërë një gjyq për anëtarët e familjes Shehu. Kjo ka qenë forma që ka pasur Shqipëria; pronat ishin ato që ishin trashëgim nga e kaluara. Unë kam bërë një gjyq për trashëgimtarët Shehu; sot mund të jenë 250 trashëgimtarë. Nuk më ka interesuar fare ky proces. Nëse ka një gabim ai vendim, duhet lexuar vendimi. Por nuk i lejoj vetes time të interpretoj vendimin sot. Unë kam qenë shumë i rregullt në zbatimin e ligjit, nuk e kam shkelur asnjëherë. Po të kisha hapur rrugë, do isha si shokët e mi. Një “talk show” i vendosur në një orar “prime time”, çdo të martë dhe të enjte ora 21:00 që në thelb nuk synon ti shtohet numrit të madh të emisoneve të aktualitetit politik, më tepër sesa ka si objektiv të sjell një trend të ri të komunikimit publik në studiot televizive. Formati “face to face” synon të përcjell mesazhe të drejtëpërdrejta dhe lehtësisht të perceptueshme nga publiku. #quovadis #vizionplustv #pranveraborakaj