Forcat e Armatosura të Shqipërisë festojnë 101 vjetorin e krijimit

Në sallën e auditoriumit të Ministrisë së Mbrojtjes, u zhvillua sot paradite ceremonia e festimit të 101 vjetorit të krijimit të Forcave të Armatosura të Republikës së Shqipërisë. Në ceremoninë e organizuar me këtë rast morën pjesë Ministri i Mbrojtjes Znj. Mimi Kodheli, Shefi i Shtabit të Përgjithshëm të FARSH-së, gjeneralmajor Jeronim Bazo, zëvendësshefi i Shtabit të Përgjithshëm të FA, gjeneralmajor Viktor Berdo, komandantë të forcave kryesore dhe njësive autonome, atashe ushtarakë të akredituar në vendin tonë, drejtorë drejtorish në MM dhe SHP si dhe ish-ministra të Mbrojtjes. Fjala përshëndetëse në këtë ceremoni të kremtimit të 101 vjetorit të krijimit të Forcave të Armatosura Shqiptare, u mbajt nga Shefi i Shtabit të Përgjithshëm të FARSH-së gjeneralmajor Jeronim Bazo. Gjeneral Bazo pasi vlerësoi historinë plot angazhime dhe suksese, hera herës me vështirësi të mëdha dhe sfida të FA Shqiptare, nënvizoi faktin se ajo mbart në vete gjithë historinë e luftës së armatosur të popullit tonë, për mbijetesë, për zhvillim e prosperitet, duke na dhënë mundësinë të jemi krenarë ashtu si historia e popullit dhe e shtetit shqiptar në këto 101 vjet. "Forcat e Armatosura sot kujtojnë me respekt gjithë kontributet dhe sakrificat e bëra gjatë ekzistencës së vet. Ne kujtojmë ata që e drejtuan këtë forcë, duke filluar nga Ministri i Parë i Luftës Mehmet Pashë Dërralla e Shefi i Shtabit Madhor Ali Shefqet Shkupi, si dhe gjithë të tjerët, të cilët përgjatë një shekulli punuan me përkushtim për Forcat e Armatosura. Por me nderimin më të madh ne kujtojmë ata që sakrifikuan edhe jetën, në kulmin e moshës, që nga fillimet e shtetit shqiptar e deri tek dëshmori më i ri, Kapiten Feti Vogli" u shpreh gjeneral Bazo.