ማኅሌት ዘልደት - በሊቀ ጠበብት ጥበብ ይኄይስ

ማኅሌት ዘልደቱ ለእግዚእነ ወመድኀኒነ --- ርእይዎ ኖሎት አእኰትዎ መላእክት ዮም ሰማያዊ በጎል ሰከበ ለዘተወልደ እምቅድስት ድንግል --- በጎል ሰከበ በአጽርቅት ተጠብለለ ኀደረ ማኅፀነ ድንግል፤ እፎ ተሴሰየ/፪/ ሀሊበ ከመ ሕፃናት ተሴሰየ --- ውስተ ማኅፀነ ድንግል ኀደረ/፪/ ሥጋ ኮነ ወተወልደ በሥጋ ሰብእ/፫/ --- አንፈርዓፁ ሰብአ ሰገል /፪/ አምኃሆሙ አምጽኡ መድምመ --- ወትምክሕተ ዘመድነ/፪/ በወሊዶተ ዚአከ ይእቲ እግዝእትነ/፪/ ማርያም ድንግል --- ምልጣን: ዮም ፍስሐ ኮነ በእንተ ልደቱ ለክርስቶስ እምቅድስት ድንግል ውእቱ ኢየሱስ ክርስቶስ ዘሎቱ ሰብአ ሰገል ሰገዱ ሎቱ አማን፣ መንክር ስብሐተ ልደቱ --- እስመ ለዓለም: ተወልደ ኢየሱስ በቤተልሔም ዘይሁዳ አዋልደ ጢሮስ አሜሃ ይሰግዳ ሰብአ ሰገል አምጽኡ ሎቱ ጋዳ ወይትኃሠያ አዋልደ ይሁዳ --- ዕዝል: በጎል ሰከበ በአጽርቅት ተጠብለለ ውስተ ማኅፀነ ድንግል ኀደረ ዮም ተወልደ እግዚእ ወመድኅን ቤዛ ኩሉ ዓለም --- ምልጣን: በጎል ሰከበ በአጽርቅት ተጠብለለ እግዚእ ወመድኅን ቤዛ ኩሉ ዓለም ዮም ተወልደ --- አመላለስ: ቤዛ ኩሉ ዓለም ዮም ተወልደ/፪/ ቤዛ ኩሉ ዓለም ዮም ተወልደ/፪/