ఎఱిఁగితి నమ్మితి - అన్నమయ్య సంకీర్తన (Erigiti Nammiti - Annamayya Sankeerthana) Lyrics

ఎఱిఁగితి నమ్మితి - అన్నమయ్య సంకీర్తన (Erigiti Nammiti - Annamayya Sankeerthana) Singers - Priya Sisters ; Composer - Sri Vedavyasa Ananda Battar garu; (Courtesy - TTD & Sri Venkateswara Recording Project) Lyrics - ఎఱిఁగితి నమ్మితి నితఁడు దయానిధి మఱఁగులు మొరఁగులు మరి యిఁక లేవు వేదోద్ధరణుఁడు విశ్వరక్షకుఁడు ఆదిమూర్తి శ్రీఅచ్యుతుఁడు సోదించి కొలిచితి సుముఖుఁడై మమ్మేలె యేదెస మాపాల నితఁడే కలఁడు పరమపురుషుఁ డాపన్నివారకుఁడు హరి శాంతుఁడు నారాయణుఁడు శరణంటి మితఁడు చేకొని కాచెను తరవాతిపనులఁ దప్పఁడితఁడు హృదయాంతరంగుఁడు యీశ్వరేశ్వరుఁడు ఇదివో శ్రీవేంకటేశ్వరుఁడు వెదకితి మీతఁడు విడువఁడు మమ్మిఁక తుదకును మొదలికి దొరికినవాఁడు తాత్పర్య వివరణ: ఓ భక్తులారా! ఎఱిగితి (ఇతని నెఱిగితిమి). ఆపై ఇతనిని నమ్మితిమి. ఇతడు దయానిధి అని తెలిసికొంటిమి. మరి ఇక మఱగులు మొరగులు (చాటుమాటు వ్యవహారాలు) మాకు లేవు. ఇతడు, వేదోద్ధరణుడు (వేదములను ఉద్ధరించినవాడు). విశ్వరక్షకుడు (సదా ఈ విశ్వమును రక్షించెడివాడు). ఆదిమూర్తి (పురాణపురుషుడు) శ్రీ అచ్యుతుడు (ఎన్నడూ అంతములేనివాడు). ఇతనిని శోధించి తెలిసికొని కొలిచితిమి. సుముఖుడై (అనుకూలుడై) మమ్మేలినాడు. ఇప్పుడు యెటువైపు చూచినా మాపాలిట ఇతడే కలడు ఇది మా భాగ్యము. అంతేకాదు, యీతడే పరమ పురుషుడు (పరబ్రహ్మ), ఆపన్నివారకుడు (ఆపత్తును నివారించువాడు) శ్రీహరి. పరమశాంతమూర్తి, శ్రీమన్నారాయణుడు. ఈ విధముగా నితనిని తెలిసికొని మేము శరణంటిమి. వెంటనే ఇతడు మమ్ము చేకొని (ఆదరించి) కాచినాడు (రక్షించినాడు). తరవాతి పనులు (శరణాగతరక్షణ, మోక్షమునొసగుట) వంటి కార్యక్రమమును ఇతడు తప్పడు. ఈతడే హృదయమున అంతర్యామియై, అంతరంగుడుగా వుంటాడు. ఇతడు ఈశ్వరునికే యేలిక. ఇదిగో ఈయనే శ్రీ వేంకటేశ్వరుడు ఈతనిని వెదకి కనుగొంటిమి. ఇకపై మేము ఇతనిని విడువము. తుదకును మెడలికి దొరకనివాడు (ఆద్యంతములు కనుగొనలేనివాడు) ఈ మహానుభావుడే. (సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)