بلوچی زبان ءِ ملنگیں شاعر راشد دیدار -بلوچی مراگش بام شُبین ۔

راشد دیدار بلوچی لبزانک ءِ پڑ ءٙ شاعرے ءِ جہت ءٙ زانگ بیت ، آئی ءٙ پہ وتی شاعری ءِ باندات ءٙ غزل ءُ لچّہ ءِ تکنیک ءُ تھراں سکّیں وشّ ءُ دلکشّیں شعر نبشتہ کتگ ءُ وتی نام ماں بلوچی زبان ءُ لبزانک ءِ زرنوشتیں دپتراں نقش ءُ نمیران کتگ ، " بنی آدم ءِ عشق ءٙ مہ کپ " آئی ءِ شعرانی اولمی کتاب ءِ نام اِنت کہ پنچ سال پیسر بہ زاں سن 2016 ءٙ چہ شِنگکار زبان بھرین ءِ نیمگ ءٙ چھاپ ءُ شِنگ بیتگ ، اے کتاب ءِ شعرانی چِنئگ ءُ نزّآرگ ءِ گرانیں بار بلوچی زبان ءِ جواں سال ءُ رُژنا پگریں شاعر عدنان مقبول ءٙ وتی کوپگاں زُرتگ ، بلوچی لبزانک ءِ راجدپتر ءٙ آئی ءِ اے جوانیں کرد پہ عزت ءُ شرپ گیرآرگ بیت ، پہ اے وڈیں جھدے ءٙ ستا کرزیت ۔ہمے کتاب ءِ تہا عدنان مقبُول ، راشد دیدار ءِ پجّار ءٙ اے وڈ ءٙ نبشتہ کنت کہ " بے دُژمنیں راشد دیدار مروچی ءٙ چہ 42 , سال پیسر بہ زاں 1973 ءٙ گِس ءٙ ودی بوت ، زند ءِ شپ ءُ روچ میزاں میزان ءٙ گوزاں بوت اٙنت ، آ رُدان بوت ،کساس پنچ ءُ شش سال ءِ سند ءٙ رس اِت گُڈا واجہ تاج محمد ءٙ پہ وانگ ءُ زانگ ءِ ھاترا ءٙ بُرت ءُ پیدارک ءِ دربرجاہ ءٙ وانگ ءٙ کت ، راشد دیدار چہ کسانی ءٙ مہروان ، راج دوست ءُ زانت دوستے اٙت ، وانگ ءٙ باز سوھواٙت ، سن 1993 ءٙ آئی کیچ ءِ شہ دربرجاہ ءٙ ایف - اے ءِ چکاس دات بلئے یک پیپرے ءٙ کپگ ءِ سوٙب ءٙ آ، اے چکاس ءٙ بے صوب بوت چہ ہمد ءٙ آئی ءٙ شہ دربرجاہ یلہ دات ، نہ زاناں کجام نگیگی ءِ سوٙب زوال بیاں بوت ، پدا سگریٹ ، چرس ، تریاک ءُ ھیروئین ءِ وڈیں مردم کُشیں زھرانی سنگتی ے بُنگیج کت ، شپ جاہ ءُ روچ جاہ سرجناں بوت ، برے ھنکینے ، برے دمکے ءٙ وئیل اٙت ،چوناہا دو سئے براں سنگتاں علاج ہم کنائینت بلئے وائے نستگیں بھت ، دیدار ءِ مھر گوں نشہ ءٙ ہنچو مُحکم اٙت کہ زند ءُ مرگ ءِ سودا ءِ جنئگ ءٙ جاڑیگ اٙت بلئے نشہ ءِ یلہ دئیگ ءٙ تیار نہ اٙت ۔ مرچی باندا کیچ ءِ دمکاں وئیل اِنت ، وتی زند ءِ پش کپتگیں روچاں مرگ ءِ دیم ءٙ تیلانک دیان اِنت ۔ سنگت تنویر دیدگ ءُ ساجد فیض ءِ مھروانی ءٙ من اے شعر پول اِتگ ءُ یکجاہ کتگ اٙنت ، اے شعرانی شوھاز ءٙ من چینو وار بوتگاں اے گپّ ءٙ گُشت نہ کناں ، بسّ ہمے گُشاں کہ دیدار ءٙ شاعرے ءِ رنگ ءٙ بہ زان اِت ءُ بہ پہم اِت Balochi zuban e malanggen shaer Rashid deedar . Voice : nisar yousuf published by baam shuben . 11,august, 2021 #Rashid-deedaar #baloch-poet