Malacañang, sinagot ang paratang ni Paolo Duterte

Pinasinungalingan ni Presidential Communications Undersecretary Claire Castro ang paratang ni Davao City Rep. Paolo Duterte na “wine-weaponize” umano ng administrasyong Marcos ang International Criminal Court (ICC). “Alam naman natin ‘yung ICC, korte po ito at meron namang kaso. May kaso na kapwa natin Pilipino ang nagsampa laban sa mga ‘di umanong pang-aabuso patungkol sa EJK so ‘wag natin kalimutan ‘yan. Pilipino rin po ang nagsampa ng kaso,” saad niya nitong Huwebes, June 18, 2026. Ipinunto rin niya na 2017 pa nasampa ang kaso sa ICC laban kay dating pangulong Rodrigo Duterte, wala pa sa posisyon si Pangulong Bongbong Marcos. “‘Wag natin kalimutan ‘yung kaso nasampa ‘to 2017 pa. So hindi ito wine-weaponize, kinakailangan lang po na matugunan din ang hiling ng mga kababayan natin na kung may kailangan managot, dapat managot,” dagdag niya.