朱茵專訪｜暢談復出接拍《反起跑線聯盟2》原因｜讚「七小福」年紀輕勁專業｜指囡囡黃鶯曾經唔鍾意自己演戲｜靠睇動畫減壓養顏｜最愛《ONE PIECE》追緊《咒術迴戰》《孤獨搖滾！》｜冼如英｜冼老師｜游大東

ViuTV劇集《反起跑線聯盟》2022年首播時反應甚佳，觀眾無不大讚情節有趣又貼地，加上飾演「樂悠悠幼稚園低2級太陽班」學生的「七小福」夠晒精靈可愛，難怪一班擁躉希望原班人馬能夠再度聚首。 等足兩年，續集《反起跑線聯盟2》終於出爐，隨即掀起網民熱議，事關導演兼編審劉偉恒成功邀得久久沒有參演港劇的朱茵出山飾演「冼老師」冼如英！說到朱茵，大家當然會記得她時電影《西遊記》（1995）系列裏的紫霞仙子，那一幕單眼甜笑絕對顛倒眾生，只是回到現代，今次朱茵在《反起跑線聯盟2》裏飾演的冼老師不但對學生苛刻，就連一班家長亦非常嚴格，令人聞風喪膽「巧驚驚」！ 這位「永遠女神」早前接受本平台專訪，暢談復出拍劇的原因，又分享幕後花絮，更透露自己一直以來都是動漫迷！ 朱茵對上一次拍攝本地劇集，經已是2010年香港電台的單元劇《沒有牆的世界：第三選擇》，事隔13年再拍劇 ── 《反2》於2023年拍攝 ── 她坦言一來是導演劉偉恒夠誠意，二來是劇本夠吸引：「我冇乜演過呢種角色，同埋係個題材係親子劇，我覺得我終於有部作品，我會攬住阿女一齊睇。」 朱茵透露，原來女兒黃鶯從未看過她的舊作，甚至一度不想阿媽拍戲：「佢之前覺得化咗妝嘅媽咪同佢（距離）好遠，因為平日佢見我唔係化妝㗎嘛，同埋細個𠴱陣，佢一見到我去做戲佢唔開心，唔知係咪覺得好似蝕咗咁呢，呢個我媽媽嚟，點會畀你睇。」話咁快囡囡已經來到升讀中學的年紀，12歲的她終於明白演戲是怎麼一回事，更因為《反2》播出，母女會趁機會一邊追劇一邊討論增進感情：「（會問佢）如果係你會點，阿女你覺得個小朋友啱唔啱，或者佢媽媽咁樣你覺得點，會多咗另外一種話題。」 今次飾演冼老師，與「七小福」有大量對手戲，朱茵大讚這班小朋友得意又醒目：「佢哋好叻，好似已經入晒個角色度，經過之前嘅洗禮啦，佢哋拍咗一季已經，個個喺晒嗰個角色裏面㗎喇。我最初覺得有難度係記佢哋啲中文名，因為我係老師，我冇得叫佢Yumi B（王予殷飾）㗎，我一定要嗌佢楊心怡，佢哋反應好得意，羅有為（孫詠軒飾）、姚立安（鄭信飾），記得佢啲名要記埋佢哋形象，導演好好寫得，佢哋唔會雷同，每一個都係獨立個體。」她又笑指小演員聚集起來後「威力」強勁：「開始我都特別有啲距離，等佢哋覺得我係老師，企又企得直啲，頭髮梳得好整齊，但後來慢慢佢哋發現，你都唔係𠴱個嚟，就開始同我玩喇。」 當然，扮老師鬧學生的場面都是少不免：「Cut機之後我會攬返佢哋，你冇嘢呀嘛，你知道係要咁呀嘛。」而今次拍攝亦令朱茵一圓與欣賞已久的演藝學院師兄潘燦良演戲的心願：「梗係覺得唔夠啦，但同阿燦哥一齊做戲係會過氣癮㗎！」 朱茵復出拍劇話題度十足，網民都全力「研究」，只是大部份人僅聚焦「今昔對比」，朱茵笑指自己聰明，沒有睇到網上言論：「我睇嘅comment都係面對面見到，有啲係街坊，話我個節目禮拜一9點半播喇，咁耐冇見要支持下。」她又指完成《反2》之後，將來會拍更多本地作品：「公司都有安排，即係我都有睇緊唔同嘅劇本，所以嚟緊嘅日子，香港觀眾都會見到我會有香港嘅作品。」 講完拍劇講動漫。朱茵坦言自細睇日本動漫長大，她是《ONE PIECE》的超級粉絲：「佢哋啲夥伴嘅感情同埋support呢，我喺現實中搵唔到，咁我睇嘅時候就好enjoy。」現時她追看《咒術迴戰》和《鬼滅之刃》之餘，又會繼續重溫《名偵探柯南》：「可能由細睇到大，而家睇番以前嘅都好鍾意。」尚有另一套心頭好：「講班後生女夾band⋯《孤獨搖滾！》，我係睇咗佢電視劇（動畫），最近電影我知佢做喇（總集篇劇場版），我都會（去睇），呢啲都係我嘅精神食糧！」 採訪：游大東 拍攝：何駿軒 （29082024） #游大東 #游大東影視筆記 #游大東專訪 #朱茵 #反起跑線聯盟2 #港劇 #ViuTV #劉偉恒 #冼老師 #onepiece #名偵探柯南 #咒術迴戰 #鬼滅之刃 #孤獨搖滾