MZAZI WA MWANAFUNZI WA UDOM AELEZA KILICHOSABABISHA KIFO CHA MWANAYE

Bakari Kabuga ambaye ni baba mzazi wa mwanafunzi, Said Kabuga, aliyefariki dunia baada ya kutumbukia katika kisima cha maji eneo la Chuo Kikuu cha Dodoma (Udom), ameeleza anachokiita ni sababu ya kifo cha kijana wake na siyo michezo ya kubeti kama ilivyoelezwa. Kabuga alifariki dunia usiku wa kuamkia Novemba 26, 2025 baada ya kutumbukia kwenye kisima na taarifa kutoka kwa wanafunzi waliokuwa karibu naye zilieleza kuwa alionekana mwenye mawazo na kueleza kuwa alikuwa ametumia fedha za ada kwenye michezo ya kubahatisha. Leo Alhamisi, Novemba 27, 2025 Bakari Kabuga amesema hakuna ukweli kuwa kijana wake huyo alikuwa ametumia fedha kwenye michezo ya kubahatisha kwani siyo tabia yake na hajawahi kujiingiza kwenye michezo hiyo. Kabuga amesema anachokiamini ni kuwa kijana wake kweli huenda alikuwa na hofu lakini iliyotokana na kushindwa kufaulu moja ya masomo yake alipokuwa muhula wa kwanza kwenye masomo yake. Meneja Mahusiano wa DOM, Rose Mdame, amesema taarifa za kushindwa kufikia alama zilizotakiwa hata kupeleka kufeli mojawapo ya somo ndiyo amezisikia, hivyo akaomba kufuatilia zaidi. Hata hivyo, Rose amesema mambo yatazungumzwa na Polisi watakapokamilisha uchunguzi, hivyo kwa sasa chuo hakiwezi kuzungumza. Kamanda wa Polisi Mkoa wa Dodoma, Gallus Hyera amesema mpaka sasa Polisi hawawezi kusema kuwa kifo hicho kilitokana na kitu gani, kwani bado wanafanya uchunguzi.