"OOFUU" Farfataa Dastaa Hinsarmuu

Ayyaanni Waaqayyoo naaf baay’atee faarfannaa hedduu barreesseera faarfadheeras. Waanan hamma har’aatti faarfadhe hunda isaa iyyuu kan gabatee sammuu kootti naaf naqe, kan afaan koo irra naaf tuule, fi kan qooqa fi sagalee ani ittiin isa faarfadhu naaf kenne Waaqayyo waan ta’eef kanan ittiin of jaju miti. Hundi isaa iyyuu maddi (source) isaa tokkicha waan ta’eef ulfinni Waaqayyoo ittiin mul’ateera jedheen amana. Hunda caalaa garuu faarfannaa ani dhaggeeffadhee hin quufne kan yeroo hundumaa guddummaa Waaqayyoo fi hojii isaa isa dinqisiisaa na yaadachiisu faarfannaa “OOFUU” jedhu dha. Walaloon ykn lyrics faarfannaa kanaa akka armaan gadii ti. Hundumtuu utuu hin turiin kan turte qofaa kee Eenyu inni afaan guutee xiqqeessu maqaa kee Ilma namaa yartuu beekumsi muraasaa Qalbiitu raatessee itti buusa haasaa Mixiin Leenca wajjin wal’aansoo dhaqaa ree? Supheen suphee dhooftuu gaaffii gaafataaree? Dinqisiifatamuu qabda yaa uumaa koo x3 Wanta boca hin qqbne addunyaa dukkana Bareechitee uumte kunoo akka kana Samii hagana ga’u akka Dibaabee tti Dhistee nurra keesse jechaan utubdee ti Lafa hammana ga’u waan safara hin qabne Waan hundumaan guutte homaa itti hin waakkanne Dinqisiifatamuu qabda yaa uumaa koo x3 Oofuu oofuyee uumaa koo siif oofuu Safuu safuu kee uuma koo siif safuu Ol jennee gubbana yoo abuurre Hawwaa Hundumaan guutuu dha maaltu itti qaawwa Bantii waaqaa keessa biyya mootummaa kee Maccatu quufee bula ilaalee surraa kee Ergamoota danuu kumaaf kitilaani Warra ati isaan guutte humnaaf Ibiddaani Isa durumaa ture isa jiruuf jiraatu Jedhanii huursanii maqaa kee faarfatu Ifoota gararraa situ taa’ee ifa Macci kun hundumtuu si ilaalee quufa Dinqisiifatamuu qabda yaa uumaa koo x3 Waggoota biliyoonaaf Biiftuun ifaa jirtu Hurjiin Samii keessa faca’ee mul’atu Ji’I halkan waarii ifa laachuuf baatu Nuuf hin galle malee dinqii kee dubbatu Allaattiin waaqa irraa Bineeldonni manaa Munyuuqaan Lafa irraa Qurxummiin Galaanaa Kaan riphee qaxxisee kaan garaan foqoqee Kaan ol jedhee adeemee kaan suutumaan siqee Oogummaa kee labsa dinqii uumuu keetii Maaltu keessaa qaba kun hunduu kan kee ti Dinqisiifatamuu qabda yaa uumaa koo x3 Oogummaan kee danuu beekumsi kee adda Wanta odeeffamee hin of biraa qabda Addaam lafa hin jirree wanta hin jirre irraa Bareecchitee uumte Biyyoo gatamaa irraa Hewaanis kunoo ti Lafeen Foon uffatte Safuu dha jiruu keef qalbii koo fudhatte Dinqisiifatamuu qabda yaa uumaa koo x3 Galaana mul’ifte waan biraa irraa kaaftee Tulluu Lafa keessaa dhiittee achii ol baafte Addanni Gammoojjii kun Tulluu Bosonaa Kun Lafa misoomaa kunimmoo Lafa onaa Suni fiixee gaaraa sun suluula dhooqa Oggum oogummaan kee qalbii nama hanqooqa Dinqisiifatamuu qabda yaa uumaa koo x3 Qajeelfama dhoksaa gorsa kee addaani Kunoo toora galee adeema Goondaani Ganna teessee nyaatti waan Bona ol keesse Ati goonan malee Mixii maaltu gorsee? Dinqisiifatamuu qabda yaa uumaa koo x3 Uumamni sirnaa’uun qajeelfama kee ti Hundumtuu irraaf jalaan caasaa qooddatee ti Isa kaaniif gooftaa isa kaaniif giiftii Hawwaanisaaf gurmuu Kanniisaafis mootii Jaldeessaafis kootaa Qamaleef Kootama Seera kee kabajuun waliif abboomama Dinqisiifatamuu qabda yaa uumaa koo x3 Biqilaa Lafa irraa muka babbaa’eessa Kaan keessa jiraata kaan balaa itti dheessa Odaa fi Waleensuu Ejersaaf Birbirsa Sagalee itti ergitee yaafte Lafa keessaa Dinqisiifatamuu qabda yaa uumaa koo x3 Jireenyi kennaa dha carraan siin qoodame Namni ofii of nyaata yaada isaan goolamee Joobirri fagaatee samii irra akka kaatu Handaaqqoonis asii akka kosii haatu Leenci daggala irraa akka foon folloksu Hadurreenis manaa akka suuqa teessu Gafarsi handaraqee burraaqee akka bulu Qotiyyoonis wanjoo akka baachaa oolu Harreen diidaa nyaatee dhugee da’oo ciisa Harree manaa xeebatu dugda ishee luqqisa Wangoon Hoolaa nyaatee dabalataaf dutu Sareen mana keessaa kajeellattee bultu Hundumtuu iddoo isaatti gammadee jiraata Qooqa garaagaraan ulfina siif laata Dinqisiifatamuu qabda yaa uumaa koo x3 © Dastaa Hinsarmuu Official. ‪@dastaahinsarmuu5175‬ #dastaa-Hinsarmu #oromoo-music #subscribe