ഭഗവതിയും ദേശമക്കളും യുദ്ധത്തിന് തയ്യാറാണ് -കൊങ്ങൻപടയോട് അനുബന്ധിച്ചുള്ള കുമ്മാട്ടി #2026 #chittur

ഇന്ന് (27-02-2026) ചിറ്റൂർക്കാവിൽ കുമ്മാട്ടിയാണ് ... കൊങ്ങൻ പടയുടെ മുന്നോടിയായി നടത്തുന്ന ഒരു ചടങ്ങ് ...വീട്ടിൽ മുറ്റത്ത് അരിമാവിൻ കോലമണിഞ്ഞു അതിലെ വൃത്തങ്ങളിൽ എരുക്കിന്റെ ഇലയിൽ ഉണ്ണിയപ്പവും നിവേദ്യവും വെച്ച് ചിറ്റൂരമ്മയെ പൂജിക്കും ...കൊങ്ങൻപട മുറ്റത്തെത്തി എന്ന ഓർമ്മപ്പെടുത്തൽ കൂടിയാണത് ....ആഴ്ചകൾക്ക് മുന്നേ നടക്കുന്ന പറയെടുപ്പ് ആണ് കൊങ്ങൻ പട പടിക്കലെത്തി എന്ന് അറിയിക്കുന്നത് ....ചുറ്റുവട്ടത്തോക്കെ ആനയും മേളവുമായി പറയെടുക്കാൻ വരുമ്പോൾ അന്നൊക്കെ എന്തൊരു ആവേശമായിരുന്നു ...എന്ന് വേണമെങ്കിലും പറയെടുക്കാൻ വരാം എന്നുള്ളത് കൊണ്ട് എപ്പോഴും ഒരുങ്ങിയിരിക്കും...മുറ്റത്തെ പറയിൽ നിന്നും ആന തുമ്പിക്കൈ കൊണ്ട് നെല്ലിൽ ഒന്ന് തൊടും ...പിന്നെ അമ്പലത്തിലെ ആളുകൾ അതെടുക്കും ...നിറഞ്ഞു കത്തുന്ന നിലവിളക്കിൻ പ്രഭയിൽ പൂജയും നിറപറയും സ്വീകരിക്കാൻ ചിറ്റൂർക്കാവിലമ്മ വീട്ടിലെത്തുന്ന നിമിഷങ്ങളാണവ ....പിന്നെ കുമ്മാട്ടി ദിവസം ...ഓരോ അപ്പത്തിലും തിരി വെച്ച് പൂജ കഴിക്കുമ്പോൾ അമ്മയുടെ അനുഗ്രഹം അവിടെ നിറഞ്ഞൊഴുകും ...പിന്നെ അപ്പം തിന്നലും പൂജയില്ലാത്ത വീടുകളിലേക്ക് വിതരണം ചെയ്യലുമാണ് ... വൈകുന്നേരം കുമ്മാട്ടി കാണാൻ പോവും ....'അമ്മ സാധാരണ ദിവസങ്ങളിൽ അമ്പലത്തിൽ പോവുകയല്ലാതെ ഉത്സവങ്ങൾക്ക് പോവാറില്ല....വൈകുന്നേരം എന്റെ മൂത്ത വലിയച്ഛന്റെയും വലിയമ്മയുടെയും കൂടെയാണ് ഞാൻ പോവുക ....ഞങ്ങളെ ഏതെങ്കിലും മതിൽക്കെട്ടിനുള്ളിൽ സുരക്ഷിതരായി വലിയച്ഛൻ നിർത്തും ...വലിയച്ഛന് ഉത്സവങ്ങൾക്ക് പോവാൻ വലിയ ഇഷ്ടമായിരുന്നു ...കൊങ്ങൻ പട കാണാൻ പോവാനും അവരാണ് തുണ ....എല്ലാ വർഷവും കാഴ്ചകൾ ആവർത്തനങ്ങൾ ആണെങ്കിലും കൊങ്ങൻ പട എന്നാൽ ഇന്നും ഒരാവേശം തന്നെയാണ് ....അന്ന് എല്ലാ വീടുകളിലും സദ്യയുണ്ടാവും....ഞങ്ങളുടെ വീട്ടിലും ....ബന്ധുക്കൾ നിറഞ്ഞ ബഹളമയമായ ദിവസം....അന്നത്തെ ദിവസം അമ്പലത്തിൽ തൊഴാൻ പറ്റില്ല ....അത്ര തിരക്കാവും...രാത്രിയും ചടങ്ങുകളുണ്ട് ....കൊങ്ങൻ പടയുടെ കഥ എന്ത് തന്നെയായാലും ഒരു ജനതക്ക് വേണ്ടി മുന്നിൽ നിന്ന് യുദ്ധം നയിച്ച ഒരു ദേശത്തിനെ ദേവി രക്ഷിച്ച കഥയാണ് .....എപ്പോൾ കേട്ടാലും ആര് പറഞ്ഞാലും കോരിത്തരിക്കുന്ന കഥ ....ശ്രീ കൊട്ടാരത്തിൽ ശങ്കുണ്ണിയുടെ ഐതിഹ്യമാലയിൽ ചിറ്റൂർകാവിനെ കുറിച്ചും കൊങ്ങൻ പടയെ കുറിച്ചും പറയുന്നുണ്ട് അച്ഛന്റെ അമ്മ പറഞ്ഞു തന്ന മറ്റൊരു കഥയുണ്ട് ...ഒരിക്കൽ കുമ്മാട്ടി കാണാൻ വന്ന ഒരു ചെറിയ കുട്ടി കൂട്ടം തെറ്റി രാത്രി വീട്ടിലേക്കുള്ള വഴിയറിയാതെ അമ്പലമുറ്റത്തു കരഞ്ഞു കിടന്ന് ഉറങ്ങിപ്പോയത്രേ...ഉറക്കത്തിൽ അവനെ ആരോ വിളിച്ചുണർത്തി ...നോക്കുമ്പോൾ ഒരു മുത്തശ്ശി ...കൈയിൽ ഒരു വിളക്കുമായി വീട്ടുകാരെ കാണാതെ വിഷമിച്ചു കിടന്ന അവനെ ആ മുത്തശ്ശി അവന്റെ വീട്ടിൽ എത്തിച്ചു ...വീട്ടുകാർ കുട്ടിയുടെ കൂടെ വന്ന മുത്തശ്ശിയെ പിന്നെ നോക്കിയപ്പോൾ കണ്ടതുമില്ല....അത് വെറുമൊരു കഥയാവാം ...പക്ഷെ അത് സത്യമാണെന്ന് തന്നെ ഞാൻ വിശ്വസിക്കുന്നു ....എല്ലാ ചൊവ്വാഴ്ചയും വെള്ളിയാഴ്ചയും ആ നടയിൽ പോയി തൊഴുത ഒരു ബാല്യത്തിനും കൗമാരത്തിനും പിന്നെ മറ്റെന്താണ് കരുതാനാവുക ...ഇന്നും എന്നും ഇരുട്ടിൽ വഴി തെറ്റാതിരിക്കാൻ ആ ചൈതന്യം മുന്നിൽ വിളക്കുമായി നടക്കുന്നു ....ഇന്നും മനസ്സ് കൊണ്ട് ഞാനാ നടയിൽ തൊഴുന്നു ....വടക്കേ നടയിലെത്തി തമ്പാട്ടിയെന്ന വെളിച്ചപ്പാടിന്റെ കൈയിൽ നിന്നും ജപിച്ച ഭസ്‌മം വാങ്ങുന്നു ....ഒരാലില കാറ്റായി വന്ന് അമ്മയുടെ അനുഗ്രഹം എന്നെ #chittur പുൽകുന്നു ....എന്റെ നിറഞ്ഞ കണ്ണുകൾ കാറ്റിൽ ഭസ്മത്തരികൾ വീണതിനാലാണെന്ന് ഞാൻ എന്നെ വിശ്വസിപ്പിക്കുന്നു ... കടപ്പാട്.. വിജയലക്ഷ്മി സി എസ്.. ചിറ്റൂർ കാവ് 🙏 #chittur #palakkad #temple #festival #konganpada #youtube #kummatti #ulsavam #2026