स्वराज्याची राजधानी 'राजगड' ते स्वराज्याचं तोरण 'तोरणा' | राजगड ते तोरणा|Rajgad to Torna Range Trek

२०२३ हे वर्ष माझ्या आयुष्याला एक नवी आणि सकारात्मक कलाटणी देणारं ठरलं. निमित्त होतं—पीएचडी प्रवेश आणि त्यासोबतच सह्याद्रीतील सूक्ष्मजीवांवर (Microorganisms) संशोधन करण्याची मिळालेली सुवर्णसंधी! माझ्यासाठी आता फक्त रविवारच नाही, तर आठवड्याचे सातही दिवस सह्याद्रीच्या सानिध्यात किंवा कामात असणार होते, याचा आनंद काही वेगळाच होता. वर्षभर नाशिक ते कोल्हापूर आणि रायगड ते नगर अशा विस्तीर्ण पट्ट्यात फिरून अनेक किल्ले आणि डोंगरांवरील मातीचे नमुने गोळा केले. सर्व काही उत्तम सुरू होतं, पण हळूहळू एक दिवसीय भटकंतीची ओढ कमी होऊ लागली. आता मन ओढ घेऊ लागलं होतं ते सह्याद्रीच्या कुशीत किमान दोन-चार दिवस सलग वावरण्यासाठी! साहजिकच, 'रेंज ट्रेक्स' करण्याची इच्छा प्रबळ झाली. कोणतीही मोठी गोष्ट करण्यासाठी केलेली 'हळूहळू पण सातत्यपूर्ण' सुरुवात नेहमीच फळते; याच विचाराने मी छोटे-छोटे टप्पे पार करायला सुरुवात केली. सह्याद्रीत अशा असंख्य वाटा आहेत, पण त्यातील सर्वात प्रसिद्ध भटकंती म्हणजे—कात्रज ते रायगड! साधारण ८० किलोमीटरचा हा कात्रज-सिंहगड-राजगड-तोरणा आणि रायगड असा प्रवास. या सर्व किल्ल्यांना मी याआधी स्वतंत्रपणे भेटी दिल्या होत्या, पण त्यांना जोडणाऱ्या सह्याद्रीच्या रांगड्या पाऊलवाटा अद्याप पायाखाली तुडवल्या नव्हत्या. कात्रज ते सिंहगड आणि सिंहगड ते राजगड हे टप्पे यशस्वीरीत्या पूर्ण झाले होते. आणि आता वेळ होती—स्वराज्याची राजधानी 'राजगड' ते स्वराज्याचं तोरण 'तोरणा' हा ऐतिहासिक पल्ला गाठण्याची!