سماجیات کے طلبہ (مؤمنین) کے سامنے بنی اسرائیل (ایک مردہ سماج) کا پوسٹ مارٹم

قرآن کریم نے بنی اسرائیل کو صرف ایک تاریخی قوم کے طور پر بیان نہیں کیا بلکہ ایک مذہبی معاشرے (Society) کی حیثیت سے ان کا گہرا سماجی تجزیہ (Postmortem) کیا ہے۔ قرآن نے ان کے ذریعے دینی معاشرے کے اصول، کمزوریاں، بیماریاں، انحرافات اور ان کے اسباب واضح کیے تاکہ امتِ محمدی ان سے سبق حاصل کرے۔ جس طرح میڈیکل کے طلبہ انسانی جسم کو سمجھنے کے لیے مردہ جسم (Dead Body) کا مطالعہ کرتے ہیں، اسی طرح قرآن نے بنی اسرائیل کو ایک "نمونۂ مطالعہ" بنا کر مومنین کے سامنے رکھا ہے تاکہ وہ اپنے معاشرے میں پیش آنے والے سماجی مسائل کو پہلے سے سمجھ سکیں اور ان سے بچ سکیں۔ قرآن نے بنی اسرائیل پر اللہ کی بے شمار نعمتوں، انبیاء، کتابوں، معجزات، ہدایت، ترقی اور رشد کے وسائل کا ذکر کیا، لیکن اس کے باوجود انہوں نے نہ انبیاء کی اطاعت کی اور نہ ہی اللہ کے احکام کی پیروی کی۔ یہی قرآن کا اصل سبق ہے کہ صرف دینی وسائل اور نعمتیں کافی نہیں ہوتیں، بلکہ ان سے صحیح استفادہ اور اطاعت ہی ہدایت کا ذریعہ بنتی ہے۔