Natijaga asoslangan boshqaruvni joriy etish bo'yicha Prezident Farmoni qabul qilindi

Qurilish sohasida davlat xizmatlarini soddalashtirish va natijaga asoslangan boshqaruvni joriy etish bo'yicha Prezident Farmoni qabul qilindi O'zbekiston Respublikasi Prezidentining "Qurilish sohasida natijaga asoslangan boshqaruvni joriy etish hamda sohada davlat xizmatlarini soddalashtirish chora-tadbirlari to'g'risida"gi PF–104-son Farmoni qabul qilindi. Mazkur farmon qurilish sohasida byurokratik to'siqlarni keskin kamaytirish, sun'iy intellektni keng joriy etish va fuqarolar hamda tadbirkorlar uchun qulay xizmat muhitini yaratishga qaratilgan. Farmoning asosiy yo'nalishlari •         Qurilishga ruxsat olishda vaqt va moliyaviy xarajatlar 2 barobargacha qisqartiriladi — bu aholi va tadbirkorlar uchun sezilarli yutuqdir. •         Sohada sun'iy intellekt joriy etiladi va davlat xizmatlarini ko'rsatishda inson omili minimallashtiriladi. •         2026-yil 1-sentyabrdan respublikaning barcha hududlarida davlat xizmatlarini birlashtirgan yagona "Arxitektura va shaharsozlik talabini berish" tizimi joriy etiladi.  Shuningdek, 2026-yil 1-iyuldan muhandislik-kommunikatsiya tarmoqlariga ulash "1 ta ariza – 1 to'lov – barcha ulanish nuqtalari" tamoyili asosida amalga oshiriladi. Binoning konstruktsiyasi, mustahkamligi va yong'in xavfsizligiga ta'sir qilmaydigan rejaviy tuzilish (planirovka) o'zgarishlarida loyiha hujjatlarini hududiy kengashlar bilan qayta kelishish amaliyoti bekor qilinadi. Davlat xizmatlarini ko'rsatishda aniqlangan kamchiliklarni bartaraf etish uchun qo'shimcha 5 ish kuni beriladi. Videokuzatuv majburiyati 2026-yil 1-sentyabrdan qurilish ob'ektlarini nazorat qilishda videokuzatuv kameralaridan foydalanish hamda qurilishi yangidan boshlanadigan quyidagi ob'ektlarda kameralar o'rnatish majburiy bo'ladi: •         tadbirkorlar tomonidan quriladigan ko'p kvartirali uy-joylar, III va IV toifadagi ijtimoiy soha, mehmonxona, turizm, savdo va sanoat ob'ektlari; •         byudjet hisobidan quriladigan qiymati 3 mlrd so'mdan yuqori bo'lgan ob'ektlar shular jumlasidan. Ijro hujjatlarini raqamlashtirish Qurilish sub'ektlari tomonidan yuritilishi majburiy bo'lgan ijro hujjatlari to'liq raqamlashtiriladi. Ularni qog'oz shaklida talab etish tartibi bekor qilinadi — bu qurilish jarayonidagi qog'ozbozlikni tubdan kamaytiradi. Shu bilan birga, ko’p kvartirali uylarda kafolat muddati davomida yuzaga kelgan nuqsonlarni bartaraf etish bo‘yicha Inspeksiyaning ko‘rsatmasini bajarmagan pudrat tashkilotlarining reyting ko‘rsatkichlariga jarima Ballarini qo’llash amaliyoti joriy etiladi. Shuningdek, O‘zboshimchalik bilan to‘siq konstruksiyalarga o‘zgartirish kiritgan va tutash yer uchastkalariga qurilma qurgan shaxslarga nisbatan to‘g‘ridan to‘g‘ri jarima qo‘llash bo‘yicha javobgarlik belgilandi,   Undan tashqari, foydalanishga qabul qilinganiga 50 yildan oshgan ko‘p kvartirali uy-joylarning ixtisoslashishini o‘zgartirish va rekonstruksiya qilish taʼqiqlandi (bundan mustahkam ishlari mustasno), Ko‘p kvartirali uy-joylarning toifasini o‘zgartirish va rekonstruksiya qilish uchun qonunga zid ruxsatnoma bergan shaxslarga nisbatan javobgarlik belgilandi. Ushbu farmon qurilish sohasidagi davlat boshqaruvini tubdan yangilash yo'lidagi muhim qadam bo'lib, fuqarolar va tadbirkorlar uchun qulay, shaffof va samarali xizmat muhitini yaratish, sohada korruptsiyaviy xavf-xatarlarni minimallashtirish hamda O'zbekistonni qulay investitsiya muhiti sifatida yanada mustahkamlashga xizmat qiladi.