KISA CHA SHILINGI ELFU 50 CHAGHARIMU UHAI WA FUNDI SIMU MWANZA

Ni simanzi na vilio katika Mtaa wa Jeshini, Kata ya Pamba Jijini Mwanza… nyumbani kwa familia ya marehemu Rashid Masunga, ambapo ndugu, jamaa na majirani wamekusanyika kuomboleza kifo chake. Rashid, mwenye umri wa miaka 31, aliyekuwa fundi simu na kompyuta mtaa wa Lumumba Jijini Mwanza, anadaiwa kupoteza maisha Machi 20, 2026 majira ya jioni baada ya kupigwa kikatili na watu watatu wanaodaiwa kuwa Polisi Jamii katika eneo la Bugando Misheni. Watuhumiwa hao wa mauaji, inadaiwa walimtuhumu marehemu kuwa mhalifu na kumtaka awape shilingi elfu hamsini ili waachane naye. Mama mzazi wa marehemu Pono, Anna Gabriel amesema kifo hicho kimeacha maumivu makubwa, akidai ni tukio la kinyama na la kujichukulia sheria mkononi. Viongozi wa eneo hilo wamekemea tukio hilo, wakisisitiza kuwa taratibu za kisheria zilipaswa kufuatwa badala ya matumizi ya nguvu. Marehemu aliyekuwa mkazi wa Nyamanoro B, kata ya Ibungilo ameacha mjane na watoto wawili wadogo ambao bado ni tegemezi. Mwili wa marehemu Rashid umehifadhiwa katika hospitali ya Rufaa ya Mkoa wa Mwanza Sekoutore ukisubiri taratibu za mazishi.