Traditional Dance || කුවේණී අස්න #asne #kuweniasna #traditionaldance

උඩරට නර්තන සම්ප්‍රදායෙහි ප්‍රධාන ශාන්තිකර්මය වන කොහොඹා යක් කංකාරිය ශාන්තිකර්මය තුල දක්නට ලැබෙන අතිශය ශාස්ත්‍රීය නර්තන අංගයක් ලෙස "කුවේණි අස්න" නොහොත් "අස්නේ" නර්තනය දැක්විය හැකියි. ගායනය, වාදනය, නර්තනය යන ත්‍රිත්වයේ ම සංකලනයක් වන අස්නේ නර්තනය කංකාරියේ එන ප්‍රථම ගායනය සහිත නර්තන අංගයයි. සාම්ප්‍රදායික ශාස්ත්‍රීය පද කොටස් වලින් සමන්විත වන මෙම නර්තන අංගය, කංකාරි මඩුව තුළ රවුමට නර්තනය කරනු ලබයි. ඒ සඳහා සියලු නර්තන ශිල්පීන් සහභාගී වන අතර, සඟ මහලු පිළිවෙලින්, ශිල්පීන් විසින් පොල් පන්දම සහ ඊ ගස අතැතිව ඉදිරිපත් කරයි. කෝට්ටේ යුගයේ රචිත කුවේණි අස්න ආශ්‍රිත ගායනා මේ සඳහා භාවිත වේ. එතුළින් කුවේණියගේ විලාපය ඉස්මතු වී දැක්වේ. නර්තනයේදී සුවිශේෂී කරුණක් ලෙස විලම්භ, මධ්‍ය, දෘත යන ත්‍රිවිධ ලයටම නර්තනය සිදු කිරීම දැක්විය හැකිය. එමෙන්ම කංකාරියේ දී පොල් පන්දම රැගත් අතෝරකරු මුල් යක්දෙස්සාට ඉදිරියෙන් ගමන් කිරීම සාම්ප්‍රදායික ලක්ෂණයකි. කංකාරී මඩුවෙන් ඔබ්බට වේදිකාව තුලදී සාමූහික මෙන්ම, ඒකල වශයෙන්ද රඟ දක්වන මෙම අංගය මෙම වීඩීයෝ පටය තුල යුගල නර්තන අංගයක් ලෙස ඉදිපත් වන අතර, විශේෂයෙන් අ.පො.ස. උසස් පෙළ විෂය නිර්දේශයෙහි අන්තර්ගත කර ඇති, සිසුන්ගේ දැනුමට අවශ්‍ය පද කොටස් ඒ ආකාරයෙන්ම නිවැරදිව මෙහි ඉදිරිපත් කර ඇත.