Endilikda mahalliy g‘o‘za navlari gerbitsid va ko‘sak qurtiga chidamli bo‘ladi

Endilikda mahalliy g‘o‘za navlari gerbitsid va ko‘sak qurtiga chidamli bo‘ladi. Bu esa daladagi begona o‘tlar hamda zararkunandalarga qarshi kurashishda fermerlar uchun katta yengillik yaratadi. O‘zbekiston Respublikasi Fanlar akademiyasi tasarrufidagi Genomika va bioinformatika markazi olimlari “Porloq” va “Ravnaq” navlariga chidamlilik genini kiritdi. Mazkur navlar davlat nav sinovidan o‘tkazish uchun Qishloq xo‘jaligi ekinlari navlarini sinash markaziga topshirildi. Sinovlar muvaffaqiyatli yakunlansa, yaqin yillarda ular amaliyotga joriy etiladi. Shuningdek, O‘zbekiston va Xitoy olimlari hamkorlikda mahalliy hamda Xitoy seleksiyasiga mansub navlarni chatishtirib, “Hamkor” navini yaratdi. Ayni paytda ushbu navni kasallik va zararkunandalarga yanada chidamli qilish bo‘yicha ilmiy izlanishlar davom etmoqda. Mazkur navlarning amaliyotga joriy etilishi urug‘chilik sohasida tub burilish yasashi kutilmoqda. Natijada nafaqat ichki ehtiyoj to‘liq qoplanadi, balki qo‘shni respublikalarni ham gerbitsid hamda ko‘sak qurtiga chidamli chigit bilan ta’minlash imkoniyati yaratiladi. Tadqiqotlarni tezlashtirishda markazning fitotron laboratoriyasi muhim o‘rin tutdi — odatda 15 yil davom etadigan jarayon 3 yilgacha qisqartirildi. Laboratoriya sharoitida bir yilning o‘zida 3 marta paxta ekish imkoniyati yaratilgani nav tozaligini tezroq shakllantirishga xizmat qilmoqda. Bu haqda markaz olimi Dilshod Usmonov ma’lum qildi.