SHAYO: BOSCO HAKUTAKA NIWE MBUNGE

Moshi: Mbunge wa Moshi Mjini, Ibrahim Shayo, amesema marehemu mfanyabiashara maarufu Bosco Benedict Chuwa aliwahi kumweleza wazi kuwa hakutamani amwone akiingia kwenye siasa za ubunge, akiamini kuwa alikuwa mtu asiyejua kusema uongo. Shayo ametoa kauli hilo leo Julai 10, 2026, wakati wa ibada ya kuaga mwili wa Bosco iliyofanyika nyumbani kwa marehemu, Mtaa wa Kambaita, Kata ya Soweto, Manispaa ya Moshi. Amesema kabla ya kugombea ubunge aliwahi kumtembelea Bosco nyumbani kwake na kumuuliza kwa nini hakuwa akiunga mkono azma yake ya kuwa mbunge. “Aliniambia, ‘Mheshimiwa Mbunge, unajua ni kwa nini mimi sitaki uwe mbunge wewe? Najua tabia yako.’ Nikamuuliza, ‘Tabia gani?’” Kwa mujibu wa Shayo, Bosco alimweleza kuwa alikuwa akimwamini kwa bidii yake ya kazi, lakini alikuwa na wasiwasi kwa sababu alikuwa mtu wa kusema ukweli wakati wote. “Aliniambia, ‘Ibra mdogo wangu, Mungu amekujalia una kila kitu. Katika vijana ninaowaamini kwenye bidii ya kazi wewe ni namba moja. Lakini Ibra, hujui kusema uongo. Kwa nini unataka kuwa mbunge?’” Shayo amesema baadaye alitambua kuwa maneno hayo hayakutokana na chuki wala kumkatisha tamaa, bali yalikuwa ni mtazamo wa Bosco kuhusu changamoto za uongozi na umuhimu wa kuendelea kushikamana na uadilifu na kusema ukweli.