【無線創造畀李小龍嘅黃金機會】《青蜂俠》配音片集同上《歡樂今宵》表演奇功

#李小龍 #俞明 #歡樂今宵 自古唔少英雄豪傑懷才不遇，佢哋就係爭咗一個畀佢哋發揮嘅機會。一代巨星李小龍喺佢死之前兩年多，命運都似係咁。 1966年，因緣際會，武功高強嘅李小龍畀美國ABC電視台睇中，安排佢響《青蜂俠》飾演助手「加藤」，一個參與好多武打場面嘅角色。片集一出街，由於亮麗嘅身手，李小龍嘅鋒頭唔止蓋過主角，仲響美國觀眾嘅心目中留低咗一個好深刻嘅印象。可惜呢個契機並冇為佢嘅星途帶來咩突破。反而因為67年無線買咗《青蜂俠》返嚟配音，就令李小龍好打得嘅形象植入咗香港人嘅心裡頭。 上世紀60年代中期，粵語片進入低潮，唔少粵語片演員加盟無線，善演小人物嘅俞明就加入咗由第一代電視人蔡和平監製嘅《歡樂今宵》。 點解俞明同李小龍有咁多合照嘅？ 原來佢係李小龍嘅堂姐夫，咁睇嚟兩個人關係匪淺！ 由於《歡樂今宵》係當年全港市民茶餘飯後幾乎必睇嘅節目，所以有份演出嘅藝員甚至上過去嘅嘉賓都成功入屋，令知名度大大提升。市場觸覺超高嘅蔡和平知道要保持優勢，唯有推陳出新，於是透過俞明同李小龍嘅關係，邀請到當時已經有意向返嚟香港發展嘅佢上《歡樂今宵》亮相： 當晚佢除咗接受許冠文嘅訪問之外，仲即場表現幾乎冇人見過嘅二指壓，寸勁，同飛身側踢。唔好睇佢只係露咗兩手，呢次出位嘅表現已經進入咗啱啱脫離邵氏另起爐灶嘅嘉禾創辦人鄒文懷嘅視線範圍。其實在此之前，李小龍曾經透過童年摯友小麒麟同邵氏接觸過合作拍片嘅嘢，不過條件就傾唔埋。嘉禾馬上把握呢個千載難逢嘅機會，搵人走去美國同李小龍傾。由於嘉禾所提供嘅條件唔錯加上畀佢嘅自由度高，李小龍就一口應承，同嘉禾簽咗兩部戲。第一部戲係《唐山大兄》。部戲一上映就勢如破竹，三扒兩撥就打破全港票房最高紀錄，響東南亞亦都全面報捷。威成咁，除咗李小龍嘅武功令人耳目一新之外，唔好唔記得基於佢響《青蜂俠》同上《歡樂今宵》嘅表現已經同佢累積咗一大班潛在觀眾。咁睇，李小龍之所以前途一片光明，或多或少同佢老遠都走返嚟上《歡樂今宵》有關；當然，俞明嘅鋪橋搭路，功不可沒！