Кыйын доордун инсаны Кыдыр аке

Кыйын кездер кыйын инсандарды жаратат! Себеби эркек сыноолор менен, түйшүктөр менен такшалат, бышат. Тарых казынасы мындай инсандарга толо. Биз алардын өмүрүн, баскан жолун изилдөө аркылуу келчегибизге жол таба алабыз! Бүгүнгү кыйын кезеңдин дагы бир Кыйын Кыргызы көлдүн акелеринин эң кенжеси, диндар, аалым, олуя Кыдыр аке Байсары уулу! Кыйын кездин Кыйын Кыргызы КЫДЫР АКЕ! Байсары уулу Кыдыр акенин өмүрү жана ишмердиги кылым алмашып жаткандагы кыямат кыргындарга, өзгөчө учурга туш келген. Ал үч доорду көргөн киши. Алар; Кокон хандыгы, Баскынчы орус падышачылыгы жана баскынчы коммунистик режим. Кыргыз тарыхындагы кандуу үркүн окуясы, диндер менен диндердин, тилдер менен тилдердин тиреши, уруулук чабышуулар, бийлик талаштар, жер талаштар айтор Кыдыр акенин башынан далай иштер болуп өткөн. Кыйчалышта сөз тапкан, караңгыда көз тапкан деп сыпатталган Байсары уулу Кыдыр акенин өмүр таржымалы сизди да кайдыгер калтырбайт деген ишеничтебиз. Эң башкысы Кыдыр аке диндар, такыба, бирөөнүн акысына көз артпаган, адилеттүүлүк үчүн жакынына, тууганына да карабаган, беш маал намазын калтырбаган, жылына 30 күндүк орозосун кармаган иннсан болгон. Жыйналыштарда бий болобу, бай болобу, же атактуу манап болобу эч кимисине карабастан адилетүү түрдө чечим кабыл алган.