Political bias at fake news, nakikitang nakaimpluwensya sa pananaw ng publiko sa impeachment trial

Panayam kay Prof. Edmund Tayao, Political Analyst, kaugnay ng impeachment trial ni Vice President Sara Duterte at usapin sa grave threats. Ayon kay Prof. Edmund Tayao, malaking hamon sa publiko ang pagsasantabi ng political bias at paglaganap ng fake news at misinformation sa pagtingin sa impeachment trial ni Vice President Sara Duterte. Aniya, nagiging hadlang ang mga ito sa obhetibong pagsusuri ng mga ebidensya at isyung inilalatag sa paglilitis. Iginiit din ni Tayao na ang usapin ng grave threats ay hindi lamang dapat tingnan sa konteksto ng isang pahayag, kundi sa kabuuan ng mga pangyayari at sa umiiral na batas. Aniya, sa legal na pananaw, walang konsepto ng "conditional threat" at maaari namang magsagawa ng motu proprio na imbestigasyon ang mga awtoridad kahit walang pormal na reklamo. Dagdag pa niya, hindi naging bahagi ng imbestigasyon ng National Bureau of Investigation (NBI) ang isyung "Operation Romanov," at naniniwala siyang dapat nakabatay sa ebidensya at hindi sa haka-haka o interpretasyong pulitikal ang paghusga sa kaso. — July 14, 2026