Ўлимга маҳкумлармиз!

Ўлимга маҳкумлармиз! “Қаламингиз ҳамиша ўткир, сўзингиз ҳаққоний ва таъсирчан, ижодингиз баракали бўлсин!” (Ўзбекистон Президентининг Матбуот ва оммавий ахборот воситалари ходимларига табригидан.) “Ҳаққоний сўзлари учун ўзбек журналистлари ҳам ўлдириладиган бўлса, менимча, энг биринчи бўлиб Каримберди Тўрамурод ўлдирилади. Унинг ҳақиқатпарварлиги “каттаконлар”нинг жонига тегиб бўлди...”. (Миршариф Хўжаев, таниқли журналист, адабиётшунос.) “Ҳамкасбимиз Каримберди Тўрамуроддан ҳушёр бўлайлик, унинг жонига қасд қилишмоқда”. (Тошпўлат Раҳматуллаев, таниқли журналист.) Аллоҳ сақласа, ўлдира олишмас экан, ўлдирмоқчи бўлганларнинг анча-мунчаси ўлиб кетди. Шерали Жўраев куйлаганларидек, “Биз тўхтаб қолмадик, биз ҳали бормиз”. Байрам кунида кўнгилдан ўтганларни қоғозга туширган бўлдим: Шогирдларга Бугун байрам яхши гаплар айт, Айт тўрт қатор шеърми ёки байт. Аммо ҳақиқатни ёзмасанг, Бу касбни қўй, бу йўлингдан қайт! Ёлғон ёзсанг, машҳур бўласан. Маддоҳ бўлсанг, орден оласан, Аммо халқинг қарғайди сени, Унинг лаънатига қоласан! Ростни айтсанг, бил, қамаларсан, Балки бир кун сен отиларсан. Аммо Ҳақни айтолди, дея Халқ ёдида мангу қоларсан. Ростни айтиб, ўлган яхшими, Алдаб медал олган яхшими? Аввал аниқ бирини танла – Ўлган ёки қолган яхшими? Ёмон ёзсанг, танимас ҳеч ким, Яхши ёзсанг, ичганинг заққум. Бир нарсани унутма, дўстим: Зўр журналист – ўлимга маҳкум! Суратларга изоҳ: суратдаги журналистларнинг барчаси ўлдирилган. Урхон Жамол (1966-2018), Россиялик ҳарбий журналист, Африкада “Вагнер группаси” фаолиятини ёритгани учун отиб кетилган. Ян Куцяк (1990-2018), Словакиялик журналист, “Каттакон”ларнинг солиқдаги найрангларини фош қилгани учун ўз уйида отиб кетилган. Влад Листьев (1956-1995), ОРТ нинг биринчи Бош директори. ТВ даги “Взгляд”, “Поле чудес”, “Час пик” каби кўрсатувлар ижодкори. Сиёсий қарашлари учун отиб кетилган. Анна Политковская (1958-2006), «Новая газета» шарҳловчиси. Чеченистонда инсон ҳуқуқлари Россия томонидан поймол қилинаётгани ҳақидаги мақолалари учун ўз уйи йўлагида отиб кетилган. Жамол Аҳмад Ҳамза Хушукчи (1958-2018), Мадиналик журналист. Саудия шаҳзодаси Муҳаммад Ибн Салмонни “Вашингтон пост” газетасида танқид қилгани учун шаҳзода ёллаган қотил уни Саудиянинг Истанбулдаги консулхонасида бўлакларга бўлиб, жасадини йўқ қилган! Элисон Паркер (1991-2015) АҚШ лик журналист. У шериги Адам Уорд билан жонли эфирда кўрсатув олиб боришаётганида отиб кетилган. Уларнинг ўлдирилишини АҚШликлар жонли эфирда кўришган. Георгий Гонгадзе (1969-2000): Украиналик грузин журналист. «Украинская правда» интернет нашри асосчиси. Украина Қаҳрамони (ўлимидан сўнг!) Ўша пайтдаги Украина президенти Леонид Кучма жаноби олийларини танқид қилгани учун уни ўғирлаб кетишган ва ўлдиришган! Анастасия Бабурова (1983-2009), Россиялик журналист. Антифашистик чиқишлари учун неонацистик (миллатчилик) ташкилоти БОРН раҳбари буюртмасига биноан, Москванинг ўртасида, куппа-кундузи отиб кетилган! Ҳақиқатни ёзгани, гапиргани учун ўлдирилган журналистлар оз эмас. “Оловли нуқталар”да ишлаб, ҳалок бўлган журналистлар ҳам оз эмас. Аммо шунга қарамай, ҳалол ва пок виждонли журналистлар ҳали ҳақиқатни айтишдан, ёзишдан тўхтаганлари йўқ. Тўғри, ёлғондан ёзиб, ёлғон гапириб, ҳар байрамда мукофот, орден, медаллар олаётган журналистлар ҳам оз эмас. Аммо улар эришган нарсалар Қиёмат Куни тош босмайди. Олган мукофотлари жонларига оро кирмайди. Ҳар бир сўзимиз учун жавоб берадиган Кун эса, яқин! Шогирларга эса, журналистиканинг олтин қоидасини яна бир бор эслатаман: Ҳақиқатни ёзсанг – ўзинг ўласан! Ёлғонни ёзсанг – виждонинг ўлади! Ёлғон ёзиб, орден олиб, роҳат-фароғатда яшашни истасанг – журналист бўл! Халқнинг лаънатига эътибор берма! Икки марта чидасанг, ўрганиб кетасан! Ҳақиқатни ёзиб, ўлиб кетишни истасанг – журналист бўл! Қўрқма, қўрқув умрни узайтирмайди! Довюраклик умрни қисқартирмайди! Шунча гапимдан кейин ҳам журналист бўлмоқчимисан? Унда кафанлик сотиб ол ва у доим елкангда бўлсин! #samarkand #rek #turamurod #karimberdi #jurnalist #oav #anora #rahmatullayev