ရှမ်းမြောက် အပစ်ရပ်မှုမှာ လားရှိုးအရေးကို တရုတ်က ဘာ့ကြောင့် အလေးထားလဲ - BBC News မြန်မာ

မြန်မာ့အမျိုးသားဒီမိုကရက်တစ်မဟာမိတ်တပ်မတော် လို့ခေါ်တဲ့ ကိုးကန့်တပ် MNDAA နဲ့ မြန်မာအာဏာသိမ်း စစ်တပ်ကြားမှာ အပစ်ရပ်သဘောတူညီချက် တရားဝင် လက်မှတ်ရေးထိုးခဲ့တယ် ဆိုတဲ့ အချက်ဟာ တရုတ် နိုင်ငံခြားရေး ဝန်ကြီးဌာနက အတည်ပြုထားတဲ့ အချက် ဖြစ်ပါတယ်။ တရုတ်နိုင်ငံရဲ့ ကြားဝင်စေ့စပ်ပေးမှု၊ တွန်းအားပေးမှုတွေကြောင့် မြန်မာစစ်တပ်နဲ့ MNDAA ကြား ၇ ကြိမ်မြောက် ငြိမ်းချမ်းရေး စကားဝိုင်းတွေ ယူနန်ပြည်နယ်၊ ကူမင်းမြို့မှာ ပြုလုပ်ခဲ့ပြီးတဲ့နောက် ဇန်နဝါရီ ၁၈ ရက်က စပြီး တိုက်ခိုက်မှုတွေ ရပ်ကြမယ် ဆိုတဲ့ သဘောတူမှုကို လက်မှတ်ထိုးခဲ့ကြတယ်လို့ တရုတ် နိုင်ငံခြားရေး ဝန်ကြီးဌာနရဲ့ ပြောခွင့်ရ မစ္စ မောင်နင်းက ဆိုပါတယ်။ ဒါပေမယ့် သဘောတူမှုပါ အသေးစိတ် အချက်တွေကိုတော့ ထုတ်ဖော် မပြောပါဘူး။ နောက်ပိုင်းရက်တွေမှာတော့ လားရှိုးမြို့နဲ့ ပတ်သက်တဲ့ ပြောဆိုသံ တချို့ ထွက်ပေါ်လာပါတယ်။ အပစ်ရပ်သဘောတူမှုရဲ့ အစိတ်အပိုင်း အဖြစ် MNDAA ဟာ လားရှိုးကို မြန်မာ စစ်တပ်လက်ထဲ ပြန်အပ်ဖို့ရာ ၆ လအတွင်း အဲဒီကနေ တပ်တွေ ပြန်ရုပ်ပေးမယ် ဆိုတဲ့ ပြောဆိုမှုမျိုး ဖြစ်ပါတယ်။ ဘယ်ဘက်ကမှတော့ လားရှိုးနဲ့ ပတ်သက်ပြီး တရားဝင်ကြေညာတာ၊ ပြောဆိုတာမျိုး မလုပ်ပါဘူး။ MNDAA လားရှိုးကနေ ဆုတ်ပေးမယ် ဆိုတာ ဟုတ်တယ် မဟုတ်ဘူး ဆိုတဲ့ သတင်းတွေနဲ့ ရှုပ်ထွေးနေခဲ့ပါတယ်။ လားရှိုးမှာ MNDAA ရဲ့ အုပ်ချုပ်ရေး ယန္တရား ပုံမှန် အတိုင်း လည်ပတ်နေသလို၊ တရုတ်နှစ်သစ်ကူးကာလ အထိမ်းအမှတ် ပွဲလမ်းတွေ လုပ်နေခဲ့တယ် ဆိုတဲ့ ပြောဆို ထောက်ပြချက်မျိုးတွေကိုလည်း တွေ့ရပါတယ်။ ဒီတစ်ပတ်မှာတော့ လားရှိုး အရေးဟာ MNDAA ရယူထားတဲ့ အပစ်ရပ် သဘောတူညီချက်ထဲမှာ တကယ်ပဲ အဓိက နေရာမှာ ရှိနေလား၊ ၁၀၂၇ စစ်ဆင်ရေးတွေမှာ သိမ်းထားတဲ့ တခြား နေရာတွေရော ဘာတွေ ဖြစ်လာမလဲ၊ လားရှိုးကို ပြန်ပြီး လက်လွှဲပေးတာမျိုး တကယ် အကောင်အထည် ပေါ်လာခဲ့ရင် နိုင်ငံတဝန်းက လက်နက်ကိုင် တွန်းလှန်မှုအပေါ် ဘယ်လို သက်ရောက် နိုင်လဲ ... အာဏာသိမ်း ၄ နှစ်ကာလ စစ်ကောင်စီဟာ တရုတ်ရဲ့ ကျောထောက် နောက်ခံပြုပေးမှုကြောင့် စစ်ရေးတတ်နိုင်စွမ်း ဘယ်လောက် ရှိနိုင်လဲ ... စတဲ့ အရေးကြီးတဲ့ အချက်တွေကို ကျယ်ကျယ်ပြန့်ပြန့် ဆွေးနွေးသွားဖို့ ရှိပါတယ်။ ဒီတစ်ပတ် ပါဝင်ဆွေးနွေးကြသူတွေကတော့ .... ဝါရှင်တန် ဒီစီမြို့တော် အခြေစိုက် အမေရိကန် အမျိုးသား ကာကွယ်ရေး တက္ကသိုလ်၊ National War College က ပါမောက္ခ ဒေါက်တာ ဇါခရီ အမ် အဘူဇာနဲ့ လန်ဒန်မြို့ ဆိုးအက်စ် တက္ကသိုလ်က တရုတ်-မြန်မာ နယ်စပ်ရေးရာ ပါရဂူဘွဲ့လွန် သုတေသီ တစ်ယောက် ဖြစ်တဲ့ ဒေါက်တာ ရှုပန် တို့ ဖြစ်ပါတယ်။ ဘီဘီစီ သတင်းထောက် ကိုဝေဖြိုး စီစဥ် တင်ဆက်ထားတာကို ဖေဖော်ဝါရီ ၈ ရက်၊ စနေည မြန်မာစံတော်ချိန် ည ၈ နာရီ အချိန်မှာ ဘီဘီစီ မြန်မာပိုင်းရဲ့ ဖေ့စ်ဘုတ် စာမျက်နှာနဲ့၊ ည ၈ နာရီခွဲ အချိန် ဘီဘီစီမြန်မာပိုင်းရဲ့ ယူကျုချန်နယ် တို့ကနေ ထုတ်လွှင့် သွားမှာမို့ စောင့်မျှော် ကြည့်ရှုနိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း